ھاتە راگھاندن کو ھەڤپەیمانیا ناڤدەولەتی یا دژی داعشێ کو ئەمریکا پێشەنگیا وێ دکەت، ب دو کاروانێن جودا 59 بارهەلگرێن هاریکاریێن لەشکەری و لۆژیستیکی دەرباسی رۆژئاڤایێ کوردستانێ کرن. ھەروھا ل گۆری زانیاریان، ب رێیا ھەلیکۆپتەران 200 لەشکەرێن ئەمریکی ژی ل باژارێ حەسەکێ یێ رۆژئاڤایێ کوردستانێ ھاتنە داخستن.
ل گۆر نووچەیا سیریا عەرەب نیۆز، کاروانەکێ ژ 45 وەساییتێن لەشکەری کو تانکێر ژی د ناڤ وان دا ھەبوون، ل ھەرێما کوردستانێ دەرباسی رۆژئاڤایێ کوردستانێ بوونە و بەر ب ھەرێمێن ژێر کۆنترۆلا ھەسەدێ و ئەمریکایێ ڤە ب رێ کەتنە.
ئاژانسا فەرمی یا سووریێ سانایێ ژی پشتراست کریە کو کاروانێ ھەڤپەیمانیێ گھیشتیە ناڤ قامشلۆیێ.
ھاتە راگھاندن کاروانا دویەم ژی ژ 14 بارھلگران پێک دھات کو ئالاڤێن لەشکەری و لۆژیستیکی بارکری بوو و ژ دەریێ تانف یێ سنۆری دەرباسی رۆژئاڤایێ کوردستانێ بوویە.
ل گۆری زانیاریان پشتی دەست بکاربوونا جۆ بایدن وەکو سەرۆکێ ئەمریکایێ، حەتا نھا 2-3 کاروانێن لەشکەری دەرباسی رۆژئاڤایێ کوردستانێ ھاتنە کرن کو ھەری کێم 40 بارهەلگر ل ھەرێما کوردستانێ دەرباسی رۆژئاڤایێ کوردستانێ بوونە.
ل ئالیێ دین زانیاری ھەنە کو 200 لەشکەرێن ئەمریکی ژی ب ھەلیکۆپتەران بۆ باژارێ حەسەکێ یێ رۆژئاڤایێ کوردستانێ ھاتنە شاندن.
