49 سەناتۆرێن ئه‌مەریکی رۆژا سێشەمبێ د نامەیەکێ دا بۆ سەرۆک جۆ بایدن، سەرۆکۆمارێ ترکیێ رەجەب تایب ئاردۆگان شەرمەزار کرن و داخواز ژێ کرن کو فشارێ بێخیتە سەر ترکیێ ژ بۆ كو رەوشا مافێن مرۆڤان باش بکەت.
49 سەناتۆرێن ئه‌مەریکی، نامەیەک ئاراستەی سەرۆکێ ئه‌مه‌ریكا جۆ بایدن کر، د نامەیێ دا ھات گۆتن: «سەرۆکۆمارێ ترکیێ رەجەب تەیب ئاردۆگان وەلاتێ خوە ئێخستییە سەر ریا تاکرەوییا دەستھه‌لاتداریێ، ب ئاوایەکی سیستەماتیک ئۆپۆزسیۆنێ سەرکوت دکەت، رۆژنامەڤانان بێدەنگ دکەت و دادوەرێن سەربخوە ب دادوەرێن ئالیگرێن خوە دگوهۆریت».
د بەشەکێ دی یێ نامەیێ دا کو تایبەتە ب سیاسەتا دەرڤە یا ترکیێ، تێدا هاتییه گۆتن: «د ڤان سالێن داویێ دا ئاردۆگان بێ شەرمیانە ئێریشی کوردێن کو ھەڤکارێن ئه‌مه‌ریكایێ نە و ل سووریێ ل دژی داعشێ شەر دکه‌ن، کرییە».
هه‌روه‌ها تێدا هاتییه: «ترکیە ل ناڤچەیێ ھەڤپەیمانەکا گرنگە، ژ بەر وێ مە ئەڤ نامە نڤیسییە، پێویستە ئه‌مه‌ریكا کار بکەت ژ بۆ ستاندەردەکا بلند یا ھەڤپەیمانێن وێ هه‌بیت، ھەروه‌ھا دڤێت ئه‌مه‌ریكا ب ئاشکەرە دەربارێ مافێن مرۆڤان و کێمبوونا دەمۆکراسیێ دگه‌ل تركیێ ب ئاخڤیت، داخوازێ ژ هه‌وه دكه‌ین، ژ سەرۆک ئەردۆگان و حکوومەتا وی رە تەکەز بکه‌ن کو دڤێت د زووترین دەم دا داویێ ب ھه‌لمەتا سەرکوتکرنێ یا ل ناڤخوە و ل دەرڤەی وەلات بینیت».
ترکیە د مژدارا 2019ێ دا، تەنێ 3 رۆژان ژ پشتی فەرمانا ڤەکێشانا ھێزێن ئه‌مه‌ریكی ژ سووریێ، دەست ب ئۆپەراسیۆنەکا لەشکەری کر و ئێریشی سەر ھەرێمێن سەرێ کانیێ و گرێ سپی یێن رۆژئاڤایێ کوردستانێ کربوو.
