مەدیایا ترکیێ راگهاند، د ئۆپەراسیۆنەکا تایبەت یا میتێ دا بەرپرسەکێ پەکەکێ ل شەنگالێ هاتە دەستەسەرکرن و پشت را هاتیە ڤەگوهاستن ژ بۆی ترکییا، لێ بەلێ زانیاریێن تایبەت یێن پێگەها “دارکا مازی” ڤێ یەکێ ئاشکەرا دکەن کو هیچ ئۆپەراسیۆنەک ژ بۆی گرتنا ڤی کادرێ پەکەکێ نەهاتینە ئەنجامدان، بەلکو ئەڤ کادرێ پەکەکێ ژ لایێ پەکەکێ ب خوە ڤە و ب ئاوایەکی ئالۆز هاتیە رادەستکرن بۆ دەستێ میتا ترکیێ.
ئاژانسا ئانادۆل یا ترکیێ راگهاند، سازییا ئیستخباراتا ترکیێ “میتێ” کاری ل باکورێ ئیراقێ بەرپرسەکێ پارتیا کارکەرێن کوردستانێ پەکەکێ دەستەسەر بکەت.
ناڤێ بەرپرسێ پەکەکێ یێ کو هاتیە دەستەسەرکرن “ئیبراهیم باریم” ئێ ب کۆد ناڤێ “لاشەر”ە، و وەکو دهێتە ئیدیعا کرن د ئۆپەراسیۆنەکا تایبەت یا هەری ئالۆز دا ل شنگالێ هاتیە دەستەسەرکرن، ناڤبووری بەرپرسێ کارێن لۆجیستی یێن پەکەکێ بوویە ل ناڤچەیێ.
ل گۆر زانیاریان ل سالا 2014ێ لاشەر بەشداری خوەپێساندانێن باژاراێ وانێ ژ بۆی بوویەرێن ل کۆبانێ دقەومین بوویە، پشت را ل سالا 2015ێ تەڤلی کادرێن چییا یێن پەکەکێ بوویە.
چاڤکانیێن پێگەها دارکا مازی ئاشکەرا دکەن، پشتی کو ل سالا 2015ێ لاشەر تەڤلی کادرۆیێن چییا یێن پەکەکێ بووی، پشتی بوورینا دەمەکێ کێم ژ بۆی شنگالێ دهێتە ڤەگوهاستن داکو ب جێبەجێکرنا کارێن لۆجیستی یێن پەکەکێ ل ڤێ ناڤچەیێ رابیت، لێ بەلێ پێش ڤەگوهاستنا وی ژ بۆی شنگالێ ل چییا پرسگرێک دناڤبەرا وی و سەرکردایەتیا پەکەکێ دا دروست بوونە.
سەدەما سەرەکە یا دروستبوونا ناکۆکیان د ناڤبەرا لاشەر و سەرکرداتیا پەکەکێ دا ژ بۆی رادیکال بوونا لاشەر و دژاتیکرنا وی یا ئاشکەرا و توند ل دژی دەولەتا ترکیێ و هەلوەستێن وی یێن کوردپەروەریێ ڤەدگەرن، لاشەر ل هەر جیهـ و دەمەکی دا ل دژی ترکیێ تەڤدگەری و داخویانی ددان، ئەو کەسەکێ نەتەوی بوو ب ئاوایەکی کو هندەک جاران ژ بەر ڤان هەلوەستێن خوە د ناڤا پەکەکێ دا ئەو ب پەدەکەیی دهاتە بناڤکرن، پەکەکێ چەندین جاران هوشداری ب وی دان، لێ بەلێ وەکو ئاشکەرا پرسگرێکێن د ناڤبەرا وان دا پڕ کوور بوون لەوما پەکەکێ خواست ب رێیەکێ ناڤبووری تەسفیە بکەت.
چاڤکانیێن پێگەھا دارکا مازی ل شەنگالێ ھەر وەھا ئاشکەرا کرن هیچ ئۆپەراسیۆنەک ل شەنگالێ نەھاتیە ئەنجام دایین، بەلکو ئەڤ بەرپرسێ پەکەکێ د بازارەکێ ئیستخباراتی دا د ناڤبەرا ئیستخباراتا پەکەکێ و میتا ترکیێ دا ل رۆژا 3/2/2021ێ ھاتیە رادەستکرن، ژ بەرکو ئەڤە دەما 7 رۆژانە چ کەسەک نزانیت لاشەر ل کودەرێ یە و چ کار دکەت، ھەر دەما کەسەکێ پرسیار کربا لاشەر ل کویە ژی، پەکەکێ د بەرسڤ دا دگۆت ئەو ژ بۆی کارەکی تایبەت ژ بۆی دەرڤەی شەنگالێ ھاتیە شاندن.
ل شەنگالێ ھەر تشت د بن کۆنترۆلا پەکەکێ دایە و هیچ کەسەک نکاریت کارەکێ ب ڤی ئاوا ل شەنگالێ پێک بینت و پەکەکە ھایدار نەبیت، پرسیارا کو ل ڤێرە دروست دبیت ئەڤەیە، گەلۆ گەر پەکەکە هایدار نەبوویە بۆچی پێش مەدیایا ترکیێ نووچەیێ گرتنا ڤی کادرێ خوە بەلاڤ نەدکر، بۆچی ب ڤی ئاوا و ب ڤێ هێسانیێ وەکو دهێتە ئیدیعاکرن دێ میتا ترکیێ کاریت “ئۆپەراسیۆنەکا” ب ڤی رەنگی ل شەنگالێ پێک بینیت؟!!
ئەڤە جارا یەکەمین نینە کو پەکەکە کادرێن خوە تەسفیە دکەت، پێش نها ژی چەندین کادرێن خوە تەسفیە کرینە، ئەڤجا ب کوشتنێ بیت یان ژی ب رادەستکرنا وان ب یەک ژ سازیێن ئیستخباراتی یێن دەولەتێن داگیرکەرێن کوردستانێ ب گشتی و ترکیێ ب تایبەتی.
