باله‌فرێن جه‌نگ یێن ده‌وله‌تا تركیێ ئیرۆ پاش نیڤرۆژێ، حه‌ره‌كه‌تا چه‌كدارێن په‌كه‌كێ ل بنارا چیایێ گاره هه‌ده‌ف كر، بۆردۆمان ل نێزیكی گوندێ ئێكماله پێكهاتییه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا ئینی 12/2/2021ێ، باله‌فرێن حه‌نگێ یێ ده‌وله‌تا تركیێ، لڤ و ته‌ڤگه‌رێن چه‌كدارێن په‌كه‌كێ ل چیایێ گاره هه‌ده‌ف كرن، ئه‌ڤ بۆردۆمان ل نێزی گوندێ ئێكماله یێ ناڤچه‌یا سه‌رسنكێ گرێدایه ده‌ڤه‌را به‌رێ گاره پێكهاتییه.
ل گۆر ئاگاهیێن ده‌ستێ مه، باله‌فران ل ده‌مژمێر 2:55 ئێڤارا ئیرۆ، دوو رۆكێت ل حه‌ره‌كه‌تا چه‌كدارێن په‌كه‌كێ داینه، لێ به‌لێ ئاگاهی ل ده‌ربارا زیانێن جانی نه‌هاتینه ب ده‌ست خستن.
ئه‌ڤ هێرش هه‌موه‌ختا هێرشا شه‌ڤا ده‌رباسبووی دهێت وه‌ختا كو باله‌فران ل ده‌مژمێر 11:50 گرێ مرانێ یێ هنداڤی ناڤچه‌یا چه‌مانكێ بۆردۆمان كری.
ده‌وله‌تا تركیێ ل رۆژا چارشه‌مبییا رابووری 10/2/2021ێ، ئۆپه‌راسیۆنا ب ناڤێ په‌نجا باز – 2 ل باشوورێ كوردستانێ ل دژی رێخستنا په‌كه‌كێ ده‌ست پێ كر، ژ وێ ده‌مێ ڤه ئه‌ڤ جارا سێیه‌مینه لڤ و ته‌ڤگه‌رێن چه‌كدارێن په‌كه‌كێ ل چیایێ گاره ب دژواری دهێنه هه‌ده‌ف كرن.
رێخستنا په‌كه‌كێ ژ وه‌ختا ده‌ستپێكرنا قووناغا یه‌كه‌مین یا ئۆپه‌راسیۆنا په‌نجا باز كو ل خزیرانا سالا رابووری بوو، حه‌ره‌كه‌تا چه‌كدارێن خوه خستنه ناڤا گوند و نێزیكی باژارۆكان، ئه‌ڤ یێك بوویه سه‌ده‌ما شه‌هید و بریندار كه‌تنا هه‌ژماره‌كه سڤیلێن باشوورێ وه‌لات ب تایبه‌ت ل سینۆرێ پارێزگه‌ها دهۆكێ، په‌كه‌كه ڤێ یه‌كێ ب ئه‌نقه‌ست دكه‌ت ژ بۆ كو ئارتێشا تركیێ كێشی باشوور بكه‌ت و شه‌ر نێزیكی گوند و باژارۆكان ببیت.
