سەرۆکێ بەرێ یێ ئەنجوومەنا پارێزگەھا کەرکووکێ دبێژیت، ئەگەر د رەوشا نھا دا ل کەرکووکێ ھه‌لبژارتن بهێنه کرن، دێ زیان ب كوردان كه‌ڤیت.
سەرۆکێ بەرێ یێ ئەنجوومەنا پارێزگەھا کەرکووکێ کو ژ ئالیێ پارلەمەنتۆیا ئیراقێ ڤە ھات ھه‌لوەشاندن، رێبوار تالەبانی ژ بۆ پێگه‌ها باس نیۆس گۆت: نھا شیعه ل سەر گەلەک تشتان ناکۆکن، د مژارا هه‌لبژارتنان دا ژی شیعه بێ خەمن، هه‌لبژارتن بهێنه كرن یان نه‌هێنه كرن، ژ بۆی وان نه‌خه‌مه، ل گۆری تەخمین و پێشبینییان، هه‌لبژارتنێن ئیراقێ د وەختا خوە دا ناهێنه کرن، ژ خوە بەشەکێ مەزن ژ شیعه‌یان ژی ناخوازن هه‌لبژارتن بهێنه کرن.
رێبوار تالەبانی ھەروه‌ھا گۆت: ئەو رۆژا کو ژ بۆ هه‌لبژارتنێن ئیراقێ ھاتییە دەستنیشانکرن، دێ زیانێ گه‌هینیته كوردان، ژ بەر کو رەوشا کو کەرکووک و دەڤەرێن کوردستانی تێدایه، سەربازی و ئالۆزە و ئازادی ژی نینە، ژ بەر وێ ژی هه‌لبژارتن بێ سوودە، دڤێت رەوش بهێته نۆرمالکرن، پاشێ هه‌لبژارتن بهێنه کرن.
ب گۆتنا رێبوار تالەبانی، پارتیێن کوردستانی ژی ل سەر وێ یەکێ ھەڤنێرینن کو دڤێت ل دەستپێکێ رەوشا کەرکووکێ و دەڤەرێن کوردستانی بهێته نۆرمالکرن پاشێ هه‌لبژارتن بهێنه كرن.
