رێڤەبەریا ناڤەندی یا پارتیا دەمۆکراتیکا گەلان (ھەدەپە) ل سەر کوشتنا 13 دیلێن د دەستێ پەکەکێ دا، بانگ ل ترکیا و پەکەکێ کر بوویەرێ رۆن بکەن و بەرپرسیاریا کیژان ئالی تێدا ھەبیت ژ بۆ رایا گشتی یا جیھانێ ئاشکەرا بکەن.
ھەدەپێ ب داخویانیەکا نڤیسکی دیار کر، “نەکو دەستهلاتداری ژ پارتیا مە حەسابێ بپرسیت، پێویستە حەسابێ بدەتە جڤاکی. د ھەمان دەمی دا پەکەکە ژی دڤێت دیلێن د دەستێ وێ دا کو ژ وان بەرپرسە چاوا جان دانە و بەرپرسیا وان چیە ژ بۆ ترکییا و رایا گشتی یا جیھانێ ئاشکەرا بکەت.”
ھەدەپێ ھەروھا سەرساخی ژ مالباتان خواست و بانگ ل پەکەکێ کر کو چ دیلێن د دەستێ وان دا ھەبن سەربەست بەردەت و نەھێلیت د ناڤ شەر و پەڤچوونان دا بمینن و ژیانا وان نەکەڤیتە مەترسیێ دا.
ھەدەپێ دیار کر کو ژ بۆ پێشیگرتنا مرنا تاکە رێیا ئەنجام ژێ بهێتە ستاندن داوی ئانینا پۆلیتیکایێن شەر و ب رێیێن دەمۆکراتیک و ئاشتییانە چارەسەرکرنا پرسا کوردە.
ئەڤ یەک ژی ب وێ واتەیێ دهێت کو هەدەپە داخویانیا هەپەگێ یا دەربارا کوشتنا دیلێن ترکیێ ژ لایێ بالەفرێن ترکیێ ڤە باوەر ناکەت و ب درەو دبینیت، لەورا دخوازیت بوویەر بهێتە رۆنکرن.
دهێتە زانین کو پێش نها هێزێن پاراستنا گەل “هەپەگێ” راگهاندبوو کو 13 دیلێن ترکیێ ژ لایێ بالەفرێن ترکیێ ڤە د زندانا دیلان ل گارە هاتینە بۆردۆمانکرن و هەر 13 دیل هاتینە کوشتن، ترکیێ ژی راگهاندبوو کو پەکەکێ ئەو 13 دیل ب گوللـەیان کوشتنە.
