سەرۆکێ ھەرێما کوردستانێ نێچیرڤان بارزانی پەیامەک بەلاڤ کر و هێرشا شەڤا بووری ل سەر ھەولێرێ ب توندی شەرمەزار کر.
سەرۆکێ ھەرێما کوردستانێ د پەیاما خوە دا گۆت: «هێرشا تەرۆریستی یا شەڤا دەرباسبوویی کو ب مووشەکان ل سەر ھەولێرێ ھاتە کرن و بوو سەدەما وێ یەکێ کو کەسەک جانێ خوە ژ دەست دا و نەھ کەسێن دی ژی بریندار بوون کو ھەژمارەک ژ وان ئامەریکی نە، ب توندی شەرمەزار دکه‌ین، سەرخوەشیێ ل کەسوکارێن قوربانی دكه‌ین و ھێڤییا بلەز باشبوونێ ژ بۆ برینداران دخوازین«.
د پەیاما نێچیرڤان بارزانی دا ھات ژی: «داخواز ژ ئەنجوومەنا ئاساییشا ناڤدەولەتی و نەتەوەیێن یەکگرتی دکه‌ین خه‌ته‌رییا وێ هێرشێ گەلەک ب جددی وەربگرن و کار بکه‌ن ژ بۆی رێگرتنا ل نەھشتنا گەفێن ل سەر خەلکێ ھەرێما کوردستانێ و ل رێیا ھاندانا حکوومەتا ئیراقێ ڤە ژ بۆ بجیھکرنا دەستوورا ئیراقێ و ب تایبەتی مادەیا 140«.
ھەروھا د بەشەکێ دی یێ پەیامێ دا ھات، “داخواز ژ برێز سەرۆکوەزیر و فەرماندەیێ گشتیێ ھێزێن چەکدارێن ئیراقێ و فەرماندەیێ ھێزێن ھەڤپەیمانان ل ئیراقێ ده‌کم، بلەز مەکانیزما ھەماھەنگیێ ل گەل ھەرێما کوردستانێ چالاک بکه‌ن و ھێزێن ئاساییش و پێشمەرگە ل گەل ئارتێش و دەزگەھ و ھێزێن ئیراقییان ب بەشدارییا ھەڤپەیمانان ل وێ ناڤچەیێ، پێکڤە کار بکه‌ن و ھەماھەنگ بن«.
سەرۆکێ ھەرێما کوردستانێ تەکەز دکەت، نەبوونا ھەماھەنگی و ھەبوونا ھندەک ھێز و گرۆپێن چەکدارێن دەرڤەیی فەرمان و دەستھلاتا حکوومەتا فەدەرال، بووینە سەدەما ئالۆزییا ناڤچەیێ و وھا کرییە گەفەکا بەردەوام ل سەر ھەرێما کوردستانێ ھەبە.
نێچیرڤان بارزانی گۆت ژی: ژ بۆ وێ یەکێ داخواز ژ برێز سەرۆکوەزیرێ ئیراقێ دکم بلەز لیژنەیەکا ھەڤبەشا لێکۆلینێ حکوومەتا ھەرێما کوردستان و حکوومەتا فەدەرال دەستبکار بیت و ب زووترین دەم هێرشکار بێنە پەیداکرن و ب سزایێن خوە یێن یاسایی بێنە گه‌ھاندن.
