ھاتە راگھاندن کو ل گرتیگەھا باژارێ ئۆرمییێ ل رۆژھلاتێ کوردستانێ، ب بەهانەیا کو گرتییەکی کورد خواستیە خوە بکوژیت، ب لێدانا 60 قامچییان ھاتە سزادان.
دەزگەھا مافێن مرۆڤان یا کوردستانێ کو ناڤەندا وێ ل باژارێ سنەیە دا خویاکرن، دۆھی 14ێ شوباتێ گرتیێ کورد ھادی رۆستەمی، کو ئەڤە چەند سالن ب تۆھمەتا دزیێ ھاتیە گرتن و سزایێ ژێکرنا 4 تلیان ب سەر دا ھاتیە سەپاندن، ب لێدانا 60 قامچیان ھاتە سزاکرن. ھات دیارکرن کو وی گرتیێ کورد چەند رۆژ بەرێ ھەولا خوەکوشتنێ دابوو، ژ بەر وێ یەکێ بەرپرسێن گرتیگەھێ سزایێ لێدانا 60 قامچیان دانە وی.
ھادی رۆستەمی کو خەلکێ ئۆرمیێ یە، سالا 2015ێ ب تۆھمەتا دزیێ ھاتیە گرتن و سزایێ قوتکرنا 4 تلیێن دەستێ وی یێ راستێ ب سەر دا ھاتیە سەپاندن کو حەتا نھا سزایێ وی نەھاتیە جێبەجێکرن.
چەند رۆژ بەرێ سازیا لێبۆرینا ناڤدەولەتی ئامنەستیێ داخواز ژ بەرپرسێن ئیرانێ کربوو سزایێ قوتکرنا تلیان ل سەر وی گرتیێ کورد بەتال بکەن و وی ژ نوو ڤە دادگەھ بکەن، ژ بەر کو ئەو ب شکلەکی دادپەروەرانە نەھاتیە دادگەھکرن.
ھەروھا ل ھەمان گرتیگەھێ ژ بلی وی گرتیێ کورد، 5 گرتیێن دی ژی ب تۆھمەتا دزیێ و ب قوتکرنا تلیێن دەستان ھاتنە سزاکرن کو ل بەندا جێبەجێکرنا سزایێن خوە نە.
