باله‌فرێن جه‌نگ یێن ده‌وله‌تا تركیێ ئێڤارا ئیرۆ لڤ و ته‌ڤگه‌رێن چه‌كدارێن په‌كه‌كێ ل چیایێ مه‌تینی یێ باشوورێ كوردستانێ ئارمانج كرن.
ل گۆر ئاگاهیێن ده‌ستێ مه دا، ئێڤارا ئیرۆ رۆژا سێشه‌می 16/2/2021ێ ل دەمژمێر 3:40 خۆلەک دا، باله‌فرێن جه‌نگ یێن ده‌وله‌تا تركیێ، حه‌ره‌كه‌تا چه‌كدارێن په‌كه‌كێ ل چیایێ مه‌تینی ئارمانج كر، هه‌ر چه‌ند كو زرارێن ئێریشێ نه‌هاتنه زانین لێ به‌لێ دووكه‌له‌كا مه‌زن ل جیێ بۆردۆمانێ ب سه‌ر چیا دا كه‌تییه.
ئێریشا ئیرۆ ل گه‌لیێ ب ناڤێ سیڤا یێ چیایێ مه‌تینی پێكهاتییه، ئه‌ڤ جیهـ دكه‌ڤیته هنداڤا گوندێ گوهه‌رزێ گرێدای ناڤچه‌یا دێره‌لۆكێ ل ده‌ڤه‌را نهێلێ ل قه‌زا ئامێدیێ.
ژ رۆژا چارشه‌مبیا رابووری، باله‌فرێن ده‌وله‌تا تركیێ بێ ناڤبه‌ر چه‌كدارێن په‌كه‌كێ ل باشوورێ كوردستانێ ئارمانج دكەن، په‌كه‌كه ژی هه‌ر كو دچیت حه‌ره‌كه‌تا چه‌كدارێن خوه پیتر تێخیته نێزیکی گوندان، ئه‌ڤ یێك ژی ب زرارا شێنیێن گوندان ب داوی دهێت.
