موراد قەرەیلان دوھی بەشداری بەرناما تایبەت یا ستێرک تیڤی بوو. ل سەر ئۆپەراسیۆنا گارە ئاخڤت و بوویەرێن قەومی نرخاندن. چاپەمەنییا پەکەکێ ھندەک بەشێن ئاخافتنا قەرەیلان ژێ سانسوور کربوون “ژێ بربوون”. رۆژنامەیا ئۆزگۆر پۆلەتیکا یا پەکەکێ کو ل ئەورۆپا دەردکەڤیت و ANFێ داخویانیێن قەرەیلان یێن وەکو دەما گۆتی: “پێشمەرگە بەشداری ئۆپەراسیۆنێ نەبوو، یێن کو ڤان گۆتنا دکەن ئەو دخوازن ئاژاوەگێریێ چێبکەن” ل بەشێ خوە یێ سۆرانی دا بەلاڤ نەکر.
قەرەیلان چ گۆت؟
د ئاخافتنا خوە دا قەرەیلان ل سەر پرسا عەبدوللا ئاگار کو دبێژیت، پێشمەرگە ب یۆنیفۆرمێن “جلکێن” ئارتێشا ترک بەشداری ئۆپەراسیۆنا گارە بوونە، ھوون گۆتنێن وی چاوا دنرخینن “دییار کر ئەڤ ئیدیعایە درەوە و قەرەیلان ئاخافتنا خوە ب ڤان گۆتنان بەردەوامکر: “عەبدوللا ئاگار یەک ژ کادرێن تایبەت یێن شەرێ دەروونی یە. ئەڤ کەسە رۆژێ د 6-7 کەنالێن تەلەفزیۆنی دا تڤیا دەردکەڤیت و دئاخڤیت.” ئەو کوژەکەکە کو د دەما ل سەر کاری بوو وی کەسی گەلەک کورد کوشتینە. نووکە ژی ئەو پرۆپاگاندایا دکەت. “عەبدوللا ئاگار دبێژیت، “پێشمەرگەیان د ھەمان دەمێ دا جلکێن لەشکەری کرینە بەر خوە و ل تەنشتا ئارتێشا ترک شەرێ پەکەکێ دکەن، پەکەکە ژ ڤێ یەکێ گەلەک نەرەحەتە.” تشتەک ووسا نینە. مە د دەربارێ ڤێ یەکێ دا داخویانیەک نڤیسکی ژی بەلاڤکر. ئارمانجا وی چیە؟ ئەڤ کەسە ئاژاوەگێریێ چێدکەت. ئەو ھەول ددەت کو ھەر دو لایەن (پەکەکە-پەدەکە) ل دژی ھەڤدو شەری بکەن. پشتی توێتا وی تەڤلیھەڤی چێبوون، لێ دوژمن ڤێ دکەت. دوژمن د خوازیت ناڤبەرا کوردان دا پەڤچوونەک چێبیت لەورا ژی ناکۆکییا درست دکەت. نەخێر، دڤێت کەس نەهێتە ڤێ یاریێ. ھەولدانێن ژ بۆ پێشخستنا ھەلوەستەک نەتەوەیی د ڤێ پێڤاژۆیێ دا گەلەک گرینگ و ژیانی یە. ل ڤێرە بەرپرسیاریا ھەموو ئالییێن سییاسی ھەیە.
پشتی نرخاندنا عەبدوللا ئاگار، کو قەرایلان بەحسا وی کری، کو د چاپەمەنیا ئەورۆپا یا پەکەکێ دا کەسێن وەکو فەردا چەتین نرخاندنا عەبدوللا ئاگار شرۆڤە کر و دژاتییا پێشمەرگە و ھەرێما کوردستانێ دا پێش. وەکی دی، د رۆژا یەکەما ئۆپەراسیۆنێ ANFێ راگھاند؛ “پێشمەرگەیێن رۆژ نێزیکی ئۆپەراسیۆنێ ب جیھ بوونە و دێ بەشداری ئۆپەراسیۆنێ بن”
د رۆژا دویەمین یا ئۆپەراسیۆنێ دا، ھەپەگێ نووچەیا کو دگۆت “ھێزێن پێشمەرگە بەشداری ئۆپەراسیۆنێ بوونە” درەو دەرخست.
سانسورا چاپەمەنییا پەکەکێ ل سەر ئاخفتنێن قەرەیلان ددەتە دییار کرن کو د ناڤا خەباتکارێن چاپەمەنییا ئەورۆپایێ دا ھندەک کەسێن ترکیەچی و کەمالیست ھەنە. د چاپەمەنییا پەکەکێ دا، کو پێش نها سەرکێشێ وێ باک گوول بوو، نها فەردا چەتین ئەو وەزیفە گرتییە سەرملێ خوە. فەردا چەتین و خەباتکارێن چاپەمەنیێ یێن ل دۆرا وی گەلەک نووچەیێن درەو ل دژی حکوومەتا ھەرێما کوردستانێ، پێشمەرگە، پەدەکێ و بارزانی بەلاڤ دکەن.
