حه‌یده‌ر شه‌شۆ: هیلالا شیعی یا ل شه‌نگالێ دهێته چێكرن
فه‌رماندارێ هێزێن ئێزدیخانێ حه‌یده‌ر شه‌شۆ ئه‌شكه‌ره كر، پیلانه‌ك د رۆژه‌ڤێ دا یه ژ بۆی چێكرنا هیلالا شیعی ل شه‌نگالێ.
حه‌یده‌ر شه‌شۆ ئیرۆ رۆژا پێنجشه‌مبی 25/2/2021ێ ژ بۆ كه‌نالا كوردستان 24ێ ئاخڤی و گۆت: ل ده‌ما 10 رۆژێن رابووری 3 لیوایێن میلیشیا حه‌شدا شه‌عبی ل شه‌نگالێ جی گرتنه، ئه‌ڤ میلیشیا ب فه‌رمانا وه‌زاره‌تا ناڤخوه یا حكوومه‌تا فه‌ده‌رال نه‌هاتنه وێ ده‌رێ.
حه‌یده‌ر شه‌شۆ هه‌روه‌ها هشداری دا و گۆت: میلیشیایێن حه‌شدا شه‌عبی ب سه‌ده‌ما ستراته‌جییا هیلالا زێرین كو ب هیلالا شیعی تێ ناس كرن، هاتنه شه‌نگالێ.
شه‌شۆ د به‌شه‌كا گۆتنێن خوه دا دیار كر حه‌شدا شه‌عبی هه‌روه‌ها ژ بۆ كو ناڤچه‌یا شه‌نگالێ بێخیته ژێر كۆنترۆلا خوه، هاتنه فشارێ ل گه‌لێ شه‌نگالێ دكه‌ن.
فه‌رماندارێ ئێزدیخانێ زێده‌باری كو هه‌ولێن نه‌ته‌وه‌یێن یه‌كبوویی ژ بۆی چاره‌سكرنا كریزا شه‌نگالێ ره‌خنه كر، گۆت هه‌ر جه‌نگه‌كا ل شه‌نگالێ روو بده‌ت، دێ خه‌ته‌ریێ ل سه‌ر مان و نه‌مانا ڤێ ناڤچه‌یێ و گه‌لێ وێ چێكه‌ت.
