رێخستنا مافێن مرۆڤ یا هەنگاو راگهاند، هێزێن سوپایێ پاسدارێن ئیرانێ ل یەک ژ گوندێن پیرانشەهرێ یا پارێزگەها ئۆرمیێ گوللـە بەردانە دو برایا.
هەنگاوێ راگهاند ئێڤارا رۆژا چارشەمبی 24/2/2021ێ هێزێن سوپایێ پاسدارێن ئیرانێ د رێیا گوندێ “شینوا” بەر ب گوندێ “زێدان” یێ سەر ب باژارێ پیرانشەهرێ، بێی هیچ هشیارکرنەک پێشوەخت تەقە ل دو برایا کریە و ئەو کوشتینە.
هەر وەها هەنگاوێ ناڤێ کەسێن ژ لایێ پاسداران ڤە هاتیە کوشتن ئاشکەرا کرن و راگهاند ناڤێ وان هەر یەک ژ “عەبدوللا نادری” و “عوسمان نادری”نە و خەلکێ پیرانشەهرێ نە.
تەرمێ ڤان دو برایا ژ لایێ هێزێن ئەمنی ڤە ژ بۆی پیرانشەهرێ هاتینە ڤەگوهاستن.
ل گۆر زانیاریێن هەنگاوێ، پشتی ڤێ بوویەرێ سازییا ئیستخباراتا ئیرانێ یا ب ناڤێ “ئیتیلاعات”ێ ل پیرانشەهر باب و دایک و هندەک کەسێن دی یێن ئەندامێن خێزانا ڤان دو برایا دەستەسەر کرینە.
