ئەڤ دەما 10 رۆژانە، 3 لیوایێن حەشدا شەعبی ل شنگالێ ب جھ بوونە. د وێ دەربارێ دا، فەرماندارێ پاراستنا ئێزدیخانێ حەیدەر شەشۆ ھشیاریێ ددەت.
فەرماندارێ پاراستنا ئێزدیخانێ حەیدەر شەشۆ ژ بۆ K24ێ ئاخڤت و راگھاند، 3 لیوایێن حەشدا شەعبی ل شنگال و چیایێ شنگالێ ب جھ بوونە. ھێزەک د ناڤبەرا رەبیە و سنوونێ، ھێزەک د ناڤبەرا بەعاج و شنگالێ و ھێزەکا دی د ناڤبەرا تەلەعفەر و شنگالێ دا و بەشەک ژی ل سەر چیایێ شنگالێ ب جھ بوونە.
ھەروھا شەشۆ گۆت: ئەو ھێزێن حەشدا شەعبی ل شنگالێ ب جھ بوونە، حەتا کو فشارێ ل سەر خەلکێ شنگالێ بکەن و ناڤچەیێ ب تەمامی کۆنترۆل بکەن. لیوایێن حەشدا شەعبی نە ب فەرمانا وەزارەتا ناڤخوە و حکوومەتا ئیراقێ ھاتنە.
حەیدەر شەشۆ گۆت: “ب باوەریا من، ئەو ھێزێن حەشدا شەعبی دخوازن پلانا ھیلالی شیعە ب جھ بینن. وەلاتێن ناڤچەیێ و وەلاتێن جیھانێ، چاڤێ وان ل سەر شنگالێ یە.”
حەیدەر شەشۆ دیار کر، ل سەر ئاستێ ناڤدەولەتی هیچ ھەولەکا چارەسەریا رەوشا شنگالێ نایێت سەری و گۆت: “ھەر جھێ نەتەوێن یەکگرتی کەتیە تێدا، خێر لێ نەمایە و بوویە جھێ ناکۆکیێ.”
دەربارێ ئەگەرا دەستپێکرنا ئۆپەراسیۆنەکا لەشکەری ل سەر شنگالێ دا، فەرماندارێ پاراستنا ئێزدیخانێ ھشیاری دا، هەر شەرەکی نوو ل شنگالێ دروست ببیت، دێ ل سەر خەلکێ شنگالێ مەترسی بیت.
دهێتە زانین کو پیش نها مە وەکو پێگەها دارکا مازی د دو راپۆرتان دا زانیاریێین تایبەت ل سەر رەوشا شنگالێ و ئینانا هیزەکا زێدە یا حەشدا شەعبی ب فەرمانا ئیرانێ و ب سەرۆکاتیا سەر ئەرکانێ گشتی یێ حەشدا شەعبی یێ ب ناڤێ “ئەبو فەداک” کو ژ 4 لیوایان پێک دهێت بەلاڤکربوو، هاتنا ڤان هێزێن حەشدا شەعبی ژ بۆی ڤەشارتنا چەکدارێن پەکەکێ د ناڤا حەشدا شەعبی دا و پاراستنا هیلالا شیعی ل شنگالێ و جێبەجێنەکرنا رێکەفتنا د ناڤبەرا حکوومەتا هەرێما کوردستانێ و حکوومەتا ئیراقا فەدەرال دا یە.
