ئیراقێ بەرسڤەکا توند دا ترکیا و ئیرانێ

ئیراقێ بەرسڤەکا توند دا ترکیا و ئیرانێ

ل دوور گەنگەشەیا د ناڤبەرا سەفیرێن ئەنقەرە و تەھرانێ دا ل سەر سەروەریا نەتەوەیی یا ئیراقێ، سەرۆکێ پارلامەنتۆیا ئیراقێ، محەمەد ئەل-حەلبووسی، بەرسڤا وان دا و گۆت د تشتەکی دا کو ب وە ڤە گرێدایی نەبیت دەستوەردانێ نەکەن و رێزێ ل سەروەریا ئیراقێ بگرن.

پێشتر، پشتی تاوانبارکرنا ترکیا ب “بنپێکرنا یەکپارچەئییا ئاخا ئیراقێ” ژ لایێ بالیۆزێ ئیرانێ ل بەغدایێ، ئیرەج مەسجدی، سەفیرێ ترکیا ل ئیراقێ فاتح یەلدز گۆت، “سەفیرێ ئیرانێ کەسێ ھەری داوی یە کو دکاریت تورکیێ فێر بکەت کو رێزێ ل سنۆرێن ئیراقێ بگریت.”

ئیرەج مەسجدی رۆژا شەمبی، 27ێ شوباتا 2021ێ، ژ بۆ کەنالێ رووداوێ ئاخڤتبوو و راگهاندبوو: “ئیران ھەبوونا چ ھێزێن بیانی ل ئیراقێ و دەستوەردانا لەشکەری قەبوول ناکەت، و دڤێت ھێزێن ترکیا ژ ئیراقێ ڤەکێشن و گەفێ ل سەر خاکا ئیراقێ نەکەن.”

بالیۆزێ ترکیا یێ ل ئیراقێ فاتح یلدز پشتی داخویانیا ئیرەج مەسجدی ل سەر حەسابا خوە یا تویتەرێ نڤیساند: “ل گۆر نەرینا من بالیۆزێ ئیرانێ کەسێ ھەری داوی یە کو دکاریت ترکیایێ فێر بکەت کو رێزێ ل سنۆرێن ئیراقێ بگریت.”

ل ھەمبەرێ بوویەرێ سەرۆکێ پارلەمەنتۆیا ئیراقێ محەمەد ئەل-حەلبووسی کارڤەدان نیشان دا و د حەسابا خوە یا تویتەرێ دا داخواز ژ هەر دو سەفیران کر کو کارێ خوە بکەن و مایتێکرنێ د وی کاری دا نەکەن یێ کو کارێ وان نەبیت، حەلبووسی نڤیساند: “ئەرکێ نوونەرێن شاندێن دیپلۆماتیک ل ئیراقێ یە کو نوونەرتیا وەلاتێ خوە بکەن و ھەڤکاریا ھەر دو وەلاتان خورت بکەن . دڤێت ھندەک ژ ڤان دیپلۆماتان ئەرکێن خوە باش بزانن و دەستوەردانێ نەکەن د مژارێن کو هیچ پەیوەندیەک ب وان ڤە نینە، و رێزێ ل سەروەریا ئیراقێ بگرن.”

پوستێن ھەمان بەش