گه‌لۆ ما قه‌ی شه‌رڤان ژ ڤان زارۆكان چێدبن؟

گه‌لۆ ما قه‌ی شه‌رڤان ژ ڤان زارۆكان چێدبن؟

په‌كه‌كێ ئه‌ڤرۆ ناسنامه‌یا 4 گه‌ریلایان ئا‌شكه‌را كر كو ل باشوورێ كوردستانێ جان ژ ده‌ست داینه‌، دوو ژ وان د ته‌منێ زارۆكینیێ دا‌ نه‌ و رێخستنێ وه‌ك هه‌ر جار پشتی 5 مه‌هـ ل سه‌ر وه‌فاتا وان ده‌رباس بووی ژ نوو‌ هاتییه‌ و دبێژیت:‌ ئه‌م وان ب رێزداری ل بیر تینین.

هه‌په‌گێ بالێ له‌شكری یێ په‌كه‌كێ، ئه‌ڤرۆ رۆژا پێنجشه‌مبی 4/3/2021ێ، د به‌یانه‌كێ دا ناسنامه‌یا 4 گه‌ریلایێن خوه‌ ئاشكه‌را كر كو ل ناڤه‌راستا مه‌ها 10 یا سالا رابووری د هێرشێن ده‌وله‌تا تركیێ دا ل خواركوركی جانێ خوه‌ ژ ده‌ست داینه‌، دوو ژ وان د ته‌منێ زارۆكینیێ دا نه‌.

رێخستنا په‌كه‌كێ وه‌ك‌ هه‌رده‌م ناڤ، وێنه‌ و ئاگاهیێن تام ل سه‌ر وان گه‌ریلایان د داخویانیێ دا‌ نڤیساینه‌، لێ به‌لێ ب چ ئاوایی باس ل ته‌منێ وان نه‌كر، ژ بۆ كو تاوانا ره‌ڤاندنا زارۆكێن كوردان ل سه‌ر ته‌سبیت نه‌بیت.

هه‌ر یه‌ك ژ «ده‌مهات باكور» كو ژ حه‌سه‌كێ یه‌ و «مه‌روان ره‌شۆ» ژ جۆله‌مێرگێ، ژ وێنه‌یێن وان خوه‌یایه‌ كو هێژ ئه‌و د ته‌مه‌نێ سنێله‌یێ دا نه‌ و ل گۆر ته‌ڤ یاسایێن شه‌ر و یاسایێن ناڤده‌وله‌تی، نابیت د وی ته‌مه‌نێ زوو دا‌ كه‌سێن وه‌سا د شه‌ران دا‌ بهێنه‌ بكارئینان یان ژی بهێنه‌ چه‌كدار كرن.

ل به‌لێ په‌كه‌كێ پاش كو ئه‌ڤ هه‌ردوو سنێله‌ ب كوشتن داین، ئه‌ڤرۆ هاتییه‌ و دبێژیت: ده‌مهات و مه‌روان ئه‌نه‌رژییا خوه‌ ژ فه‌لسه‌فا ئاپۆ د ستاند، ئه‌و ملیتانێن نموونه‌ یێن ئاپۆی بوون!.

به‌لێ رێخستنا په‌كه‌كێ ڤێ جارێ یا راست د داخۆیانییا خوه‌ دا‌ گۆتییه‌، ژ به‌ر كو فه‌لسه‌فا ئاپۆی ئه‌ڤه‌یه‌‌: «زارۆكێن كوردان ب ره‌ڤینه‌ و ب ده‌ستێ عه‌سكه‌رێ ترك ب كوشتن بده»‌.

رێخستنا په‌كه‌كێ ژ بۆ چێكرنا شه‌رڤانان، پشت به‌ستنێ ب ره‌ڤاندنا زارۆك و سنێله‌یان ژ هه‌ر چار پا‌رچه‌یێن كوردستانێ دكه‌ت، ئه‌ڤ یه‌ك ژ ئالیێ رێخستنێن ناڤده‌وله‌تی و رێخستنێن مافێن مرۆڤان و یێن پاراستنا مافێن زارۆكان ڤه‌ هاتییه‌ ته‌سبیت كرن.