رێخستنا ناڤدەولەتی یا شۆپاندنا مافێن مرۆڤان (HRW) راپۆرتەک ل سەر 10 سالیا شەرێ ناڤخوەیی یێ سووریێ بەلاڤ کر.
ل گۆری راپۆرتا ڤێ رێخستنا جیهانی ل عەفرینێ 604 سڤیل ھاتنە کوشتن، 7 ھەزار و 243 کەس ھاتنە رەڤاندن، 300 ھەزار کەس کۆچبەر بوونە.
ھەروھا ژ دەما کو ژ لایێ کۆمێن چەکدارێن دگەل ئارتێشا ترکیێ 18ێ ئادارا 2018ێ عەفرین هاتیە داگیر کرن حەتا نها، 314 ھەزار و 400 دارێن زەیتوونان ھاتینە برین، 28 خانی و جھ ھاتینە ھەلوەشاندن و 14 ئاڤاھیێن ئۆلی یێن پیرۆز ھاتینە روخاندن.
لێکۆلەرا HRW سارا کاییالی ل سەر ھورگلیێن راپۆرتێ گۆتیە، “نھا باکورێ رۆژھلاتێ سووریێ د بن کۆنترۆلا کوردان دایە، لێ ب گشتی کورد ل وێرێ ژی نە د رەوشەکا باش دا نە. ژ ئالیەکی ڤە ترکیا وان وەکی تەرۆریست دبینیت و ژ ئالیێ دی ڤە ژی رەژیما سووریێ دخوازیت پارچە پارچە وان دەڤەران بێخیتە ژێر کۆنترۆلا خوە.”
کاییالی ژ رووداوێ را گۆتیە، ژ پاراستنا گەلێن ھەرێمێ دڤێت ئەمریکا یا ھەڤپەیمانا کوردان ئەرکێن خوە بجھ بینیت.
