مەدیایا پەکەکێ ھاتنا پاپا نە دیت

پێشەنگێ کاتۆلیکێن جیھانێ پاپا فرانجیس 5ێ ئادارێ  چوو ئیراق و ھەرێما کوردستانێ. هەموو جیھانێ گرنگی ب ڤێ سەرەدانا پاپا دا و رۆمال کر. هەموو راگهاندنێن جیھانێ چرکە ب چرکە سەرەدانا پاپا بۆ ئیراق و ھەرێما کوردستانێ رۆمال کر. لێ بەلێ مەدیایا پەکەکێ ئەڤ سەردانە نە دیت و هیچ نووچەیەک ل سەر چێنەکرن.

جارا یەکی بۆ کو پێشەنگێ کاتۆلیکێن جیھانێ پاپا سەرەدانا ئیراق و کوردستانێ بکەت. تایبەت ژی سەرەدانا پاپا بۆ کوردستانێ، شێوازێ پێشوازیکرنا وی، جۆشا گەلێ کریستییان و مۆسلمانێن کوردستانێ ژ بۆی هەموو جیھانێ جیھێ شانازییێ بوو. تەڤاھیا دیپلۆماتێن ل کوردستانێ، کۆنسۆلخانە و هەموو دەردۆرەن سیاسی ئەڤ دیمەنە دیت و ل حکوومەتا ھەرێمێ پیرۆز کرن. لێ بەلێ مەدیایا پەکەکێ ل سەر ڤێ یەکێ هیچ نووچەیەک چێنەکر. تەنێ راگھاندنا پەکەکێ یا کو ل هەرێما کوردستانێ کار دکەت ئانکو رۆژ نیوز وەک نووچە بەلاڤ کر و گۆت: پاپا سەردانا مووسلێ کر.  بەحسا چ کوردستانەکێ و چ تشێن دی نە ھاتە کرن. یەک کەنالێ تەلەفزیۆنی یێ پەکەکێ ژی یەک دیمەن بەلاڤ نە کر.

پەکەکە ژ ئالیێ عەسکەری و سییاسی ھەر چەند تێک چووبیت ژی ژ ئالیێ راگھاندنێ ڤە خوە سەر پییا گرتیە و تێک نەچوویە. راگەهاندنەکا یەک ئالی، کو تەنێ د بەرژەڤەندییا پارتییا خوە دا کار دکەت د دەستێن وێدایە. ب چ شێوازا ل دەرڤەی خوە چ کەسەکێ نائینتە سەر شاشێن خوە. ھەمان دەمێ ژی هیچ کەسەک ژ دەرڤەی خاتا وان نکاریت هیچ تشتەکێ بەلاڤ بکەت. راگھاندنا پەکەکێ ژ بلی کارێن خوە هیچ تشتەکێ گەلێ کورد نکاریت پیرۆز بکەت. د ھاتنا پاپا دا ژی ھەمان هەلوەست نیشان دا. ھاتنا پاپا ژ بۆی هەرێما کوردستانێ گەلەک گرنگ بوو. نە تەنێ ژ بۆی باشوور بەلکو ژ بۆی هەموو کوردان گرنگ بوو. لێ بەلێ ژبەرکو پەکەکێ ئەڤە سەرەدانە نە رێکخستبوو وەکو تشتەکێ ئاسایی کو هێچ روو نەدابیت ھاتن و خواستن کو بچووک بدەنە دیارکرن.

راگھاندنا پەکەکێ ب ھەر تشتێ خوە د ئامادەباشییێ دایە کو بەس هەرێما کوردستان بچوک بکەن. راگھاندنا پەکەکێ هەرێما کوردستانی وەها ددەتە دیار کرن کو هەر تشتەک تێدا خرابە، ھەر رۆژ ژن تێنە کوشتن، زارۆک دهێنە لێدان، کەس نکاریت دژی حکوومەتێ باخڤیت، ل ھەر دەرێ لێدان ھەیە، برسیبوون ھەیە. مەدیایا پەکەکێ چ جارا سەرکەفتنەکا هەرێما کوردستانێ نە دەرخستییە سەر شاشێن خوە، نە ئابۆری، نە سیاسی، نە کولتووری، نە جڤاکی، نە بۆنەیەک، نە پەروەردە هیچ تشتەکێ خوەش ل هەرێما کوردستانێ د ناڤا راگھاندنا پەکەکێ دا ناهێتە نێشاندان. پەکەکە نە بەس تەنێ سەرکەفتنێن باشوور نیشان نادەت بەلکو ئێریشێن سەر باشوورێ وەلات ژی نیشان نادەت. دەما 15ێ شوباتێ حەشدا شەعبی ب مووشەکا ئێریشی هەولێرێ  کری، راگھاندنا پەکەکێ هیچ گرنگیەک پێ نەدا. تەنێ شەڤا یەکێ گۆتن کو “ل هەولێرێ تەقین چێبوو” پیشترا ددیار بوو ئیریشا مووشەکی هاتیە ئەنجامدان لێ جارەکا هیچ گرنگیەک پێ نەدا. پەکەکە ب تەنێ چەپێن ترک و ھندەک کەسێن دەردۆرا خوە دەرتێخیتە سەر راگھاندنا خوە و ل سەر “دەمۆکراتیک کرنا ترکیا، خرابیا هەرێما کوردستانێ و فکرێن چەپ گر” دئاخڤین.

پەکەکە ھەر تشتەکێ هەرێما کوردستانێ خراب دکەت. وەها لێھاتییە کو ھەگەر ل هەولێرێ یان ژی دوهۆکێ ترۆمبێلەک مریشکەکێ دەعم بکەت ژی، راگھاندنا وان بەلاڤدکەت کو “ئاسایشا پارتی ئاژەل کۆمکوژ کرن، ئاسایش ل دژی سرۆشتی کار دکەت”. لێ بەلێ ڤێ راگھاندنێ نە دیت پاپا فرانجیس ب ھەممو مەزناهیا خوە ڤە ھاتە ھەرێما کوردستانێ و ب چ مەزناهیەکێ ڤە ھاتە پێشوازی کرن. پەکەکە وەک نەعامەیایە، سەرێ خوە کرییە ناڤ ئاخێ نابینیت و دبێژیت بەلکو کەسێ نەدیتبیت. نەخێر ھەممو جیھانێ ئەڤ یەکە دیت. هەموو جیھانێ دیت کو کوردستان جیهێ پێکڤە ژییانێ یە، ل کوردستانێ ھەممو ناسنامەیێن ئۆلی و نەتەوی ئازاد دژین، ھزر و بیرێن هەرێما کوردستانێ گەلەک جودانە ژ رۆژھلاتا ناڤین و ئازادی تێدا ھەیە. هەموو جیھانێ ئەڤ راستییە دیت لێ راگھاندنا پەکەکێ ئەڤ یەک نە دیت. ئەڤە ب تەنێ دیت کو “پاپا سەردانا مووسل کر.”