پارتیێن سیاسی و رێخستنێن کوردێن ل باکورێ کوردستانێ داخویانیەکا ھەڤبەش بەلاڤ کرن و د وێ داخویانیێ دا ئاشکەرا کرنە کو ئەو لگەل کوردێن ئێزدی نە و پشتگریێ ل داخوازا وانا ڤەگەرا وەلات دکەن.
داخویانیا ئالیێن سیاسییێن باکورێ کوردستانێ وھایە:
ب گۆر دەنگ و باسێن کو ژ ناڤچەیا باتمان و مەردینێ تێن، ھندەک برایێن مە یێن ئێزدی، کو دخوازن ڤەگەرنە گوندێن خوە دکەڤن بەر ئێریشا پارێزڤانێن گوند و ھێزێن نۆکەرێن دەولەتێ.
ئێزدیێن کوردستانا باکور کو ھەر دەم د بن زلم و زۆرداریا دەولەتا داگیرکەر دا بوون و توشی گەلەک فەرمانان ببوون، د ڤێ داویێ دا، ژ بەر رەوشا شەر و د بن زەختا دەولەت و نۆکەرێن وێ یێن ناڤچەیێ، مەجبوور مان وارێ باب و کالێن خوە ب ج بھێلن، زەڤی و باغ و باخچە و مالێ خوە ب جیهـ بهێلن و ئاوارەیێ وەلاتێن ئەورۆپا ببن.
ھندەک ھێز و ئالیێن ناڤچەیێ، کو ب سالان زەڤیێن ئێزدییان داگیر کرینە، ژ مال و باغ و باخچەیێ وان ئیستیفادە دکەن، ئیرۆ ژی ناھێلین ئێزدی ڤەگەرن بۆ سەر مال و ملکێ خوە. گەلەک ئاستەنگا دەرتێخن بەر پێشیا وان.
نۆکەرێن رەژمیێن ناڤچەیێ و پارێزڤانێن گوندا، کو دور ژ داب و نەریتێن کوردی، دور ژ نرخێن مرۆڤاتی و ئەخلاقێ، دەست دانینە سەر مال و ملکێ ئێزدیان، ئیرۆ ژی گوھێ خوە نادەنە بریارێن دادگەھان.
سازیێن فەرمی یێن ناڤچەیێ ژی، ب ئارمانجا کو دژبەرییێ د ناڤبەرا کوردێن مسلمان و ئێزدی کوور بکن، بەرژەوەندیێن وان کەسێن کو ب زۆرێ دەست دانایە سەر ملکێ ئێزدییان دپارێزن و ژ بۆنا جێبەجێ کرنا بریارێن دادگەھێ کارێن پێویست ناکن.
برایێن مە یێن ئێزدی، کو دخوازن ڤەگەرنە گوندێ خوە ئیرۆ ژ ھەر دەمێ پێتر پێدڤی هاریکاری و پشتگریا مە نە.
ئەم پارتی و رێخستنێن سیاسی، کو ل ژێر ناڤێ مە ھەنە، پشتگریا ڤەگەرا برایێن خوە یێة ئێزدی بۆ جیێ باب و کالان دکەین.
ئەم بانگا ھەموو رێخستنێن مرۆڤ دۆست، رێخستنێن مافێ مرۆڤ، بارۆ و روسپیێن ناڤچەیێ، ھەموو پارتیێن سیاسی و نونەرێن ناڤچەیێ دکین بلا ھاوارا برایێن مە یێة کوردێن ئێزدی دا بچن. بکەڤن ناڤبەرێ داکو براینیا مەیا دیرۆکی کوور نەبە.
ئەم بانگا ھەموو ھێزێن ھەستیار و وەلاتپارێز دکین، کو بۆنا پاراستنا مافێن ئێزدیا و پشتگریا ل وان، دەستێ خوە بدەنە ھەڤدو و دەستپێشخەریەکێ بکەن.
مافێ برایێن مە یێن ئێزدی کو پارچەیەک ژ نەتەوا کوردن ھەیە، کو ئەو د وەلاتێ خوە کوردستانێ دا ب ئاوایەکێ ئەولەهـ ژییانا خوە بەردەوام بکەن و ھەبوونا خوەیا نەتەوەیی و چاندی بپارێزن. خەبات ژ بۆ ڤێ ئارمانجێ، ئەرکەکێ نەتەوەیی، ئینسانی و ئەخلاقییە.
ئەم ژ رایا گشتی را دییار دکەن کو حەتا داخوازێن رەوایێن برایێن مە یێن ئێزدی جی ب جیھ ببن ئەم دێ تێکۆشینێ کەین و ڤێ پرسێ بشۆپینن.
دڤێت ئێزدی بێ ترس و خۆف و ب ئاوایەکێ ئازاد ڤەگەرن وارێ باب و کالێن خوە.
پەدەکە-باکور، پێلکورد، پەسەکە، تەڤگەر، پاک
