په‌كه‌كه و شریكێن خوه ل خانه‌سوورێ ب شه‌ر چوون
شه‌ر ل نێڤبه‌را هێزه‌كا گرێدای رێخستنا په‌كه‌كێ و هێزه‌كا ئارتێشا ئیراقێ ل سنوونێ چێبوو، ئه‌ڤ شه‌ر ل سه‌ر سۆزه‌كێ پێكهاتییه كو حكوومه‌تا ئیراقێ ب په‌كه‌كێ داییه، لێ به‌لێ هێژان جی ب جی نه‌كرییه.
ل گۆری ئاگاهیێن ده‌ستێ مه، ئیرۆ رۆژا پێنجشه‌مبی 11/3/2021ێ، هێزه‌كا گرێدای په‌كه‌كێ ل كۆمه‌لگه‌ها خانه‌سوورێ یا گرێدای ناڤچه‌یا سنوونێ، خوه‌پێشاندان ل دژی ئارتێشا ئیراقێ كر، پشتره ئه‌ڤ خوه‌پێشاندان بوو شه‌ر، د ئه‌نجاما شه‌ر دا، عه‌سكه‌ره‌كێ ئیراقێ بریندار كه‌تییه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئه‌ڤ شه‌ر ب سه‌ده‌ما وێ یه‌كێ چێبوویه كو ئارتێشا ئیراقێ پاش ئیمزا كرنا په‌یمانا شه‌نگالێ، سۆز ب هێزا پاراستنا ئێزدیخانێ یا گرێدای په‌كه‌كێ دابوو كو هه‌ژمارا 1500 چه‌كدارێن وان د رێزێن ئارتێشا ئیراقێ ده وه‌زیفه دار بكه‌ن.
ده‌ست نیشان كر، ئیرۆ ده‌ما ڤێ سۆزێ ب داوی بوو و ئه‌ڤ خوه‌پێشاندان و شه‌ر ژێ ده‌ركه‌ت.
هێژای گۆتنێ یه، ل سالا رابووری، حكوومه‌تا باشوورێ كوردستانێ و حكوومه‌تا ئیراقێ، په‌یمانا ئاسایی كرنا ره‌وشا شه‌نگالێ ئیمزا كر، ئه‌ڤ په‌یمان رێ ب ڤه‌گه‌رینا ئاواره‌یێن شه‌نگالێ، ئاڤه‌دانكرنا باژێر دده‌ت و پێویست دكه‌ت په‌كه‌كه و حه‌شدا شه‌عبی ژ شه‌نگالێ ده‌ركه‌ڤن.
لێ به‌لێ رێخستنا په‌كه‌كێ و حه‌شدا شه‌عبی ل دژی په‌یمانێ ده‌ركه‌تنه و ژ شه‌نگالێ ده‌رنه‌كه‌تنه و بوونه سه‌ده‌م كو ئه‌ڤ په‌یمان نه‌هێته جی ب جی كرن.
