جڤینا نێڤبه‌را بارزانی و «كه‌سه‌كێ حزبه‌كا دن» پێكناهێت

جڤینا نێڤبه‌را بارزانی و «كه‌سه‌كێ حزبه‌كا دن» پێكناهێت

جڤینا كو باس لێ دهات كرن كو وێ ل نێڤبه‌را سه‌رۆك مه‌سعوود بارزانی و لاهۆر شێخ جه‌نگی پێكهێت، نایێ ئه‌نجام دایین، پارلمنته‌ره‌كا به‌رێ یا په‌ده‌كێ ئه‌شكه‌ره‌ كر، ئه‌ڤ «كه‌سێ» ژ بوویه‌رێن 16ی ئۆكتۆبه‌رێ به‌رپرس، پێویسته‌ داخوازا لێبۆرینێ ژ گه‌ل كورد بكه‌، هه‌ر وه‌ختا ئه‌ڤ یێك پێكهات، ل وێ چاخێ جڤین وێ ئاسایی به‌.

ئه‌ڤ ده‌ما چه‌ند رۆژانه‌، مژارا پێكهاتنا جڤینه‌كێ ل نێڤبه‌را سه‌رۆك بارزانی و لاهۆر شێخ جه‌نگی دهات كرن، ئه‌ڤ یێك ل سۆسیال مه‌دیایێ ب به‌فره‌هی هات باس كرن، دهات گۆتن كو هنه‌ك كه‌س ناڤبه‌ینكاریێ ژ بۆی ڤێ جڤینێ دكن و بارزانی په‌یام ژ بۆی لاهۆر شاندنه‌.

ئیرۆ رۆژا شه‌می 13/3/2021ان، ئامینا زكری پارلمه‌نته‌را په‌ده‌كێ یا به‌رێ ل پارلمه‌نا كوردستانێ داخویانی ل ده‌ربارا ڤێ جڤینێ دا و ئه‌شكه‌ره‌ كر، جڤینا كو تێ گوتن وێ ل نێڤبه‌را سه‌رۆك بارزانی و كه‌سه‌كێ حزبه‌كا دن پێك هێت، تو راستییه‌ك ژ بۆ نینه‌.

ئه‌ڤ ژی داخویانییا ئامینا زكری یه‌ كو ل رۆپه‌لا خوه‌ ئا فێسبووكێ پارڤه‌كرییه‌:

ل ده‌ربارا جڤینا جه‌نابێ سه‌رۆك بارزانی:

ئه‌ڤ چه‌ند رۆژه‌ پر ئاخافتن ل سه‌ر مه‌سه‌لا جڤینا جه‌نابێ سه‌رۆك بارزانی و كه‌سه‌كێ حزبه‌كا دن تێ كرن، ل ده‌ستپێكێ پێویسته‌ بێژم كو جه‌نابێ سه‌رۆك هه‌موو ده‌مه‌كێ، هه‌موو سه‌رده‌مه‌كێ هه‌گه‌ر زانیبه‌ كو مژاره‌ك وێ ئاشتییا كۆمه‌لاتی ل په‌ی به‌، وێ سه‌قامگیری سیاسی دروست بكه‌، چ ده‌مه‌كێ دوو دل نه‌بوویه‌، هه‌گه‌ر ئه‌ڤ یێك ل سه‌ر حه‌سابا قوربانیدانا شه‌خسێ سه‌رۆك و حزبا وی ژی به‌، مێژوو ل سه‌ر ڤێ ئاخافتنێ شاهده‌.

ل ده‌ربارا بابه‌تا جڤینێ كو هێژان بابه‌ته‌كا گوره‌، پێویسته‌ ئه‌م بپرسن گه‌لۆ قه‌ی سه‌رۆك بارزانی كێشه‌یێن شه‌خسی ل گه‌ل كه‌سه‌كی هه‌نه‌؟ گه‌لۆ قه‌ی ئه‌وا ل كه‌ركووكێ و 16ی ئۆكتۆبه‌رێ هاتییه‌ ئه‌نجام دایین ل به‌رانبه‌ر سه‌رۆك بارزانی بوو یان ژی ل همبه‌ری هه‌موو گه‌لێ كوردستانێ بوو؟ كی هه‌بوو ل ڤی وه‌لاتی دلێ وی نه‌شكه‌ست به‌، چ كورده‌كی ئازار ژ سه‌ده‌ما 16ی ئۆكتۆبه‌رێ نه‌دیت.

له‌وما كه‌سه‌كی كو ئه‌ڤ كاره‌ ئه‌نجام دابه‌، ب داخوازا لێبۆرینێ ژ هه‌موو گه‌لێ كوردستانێ قه‌رداره‌، هه‌گه‌ر ئه‌ڤ یێك پێكهات ل وێ چاخێ جڤین و روونشتن وێ ئاسایی بن.

ئامینا زكری