12ێ ڤێ ھەیڤێ هەپەگێ داخوویانییەک بەلاڤکر و تێدا ب رەنگەکێ نەراستەوخۆ قەبوول کر کو ئەو مینا ل سیدەکان ب پێشمەرگەیان ڤبە تەقیابوو و بووبوو سەدەما شەهیدکرنا پێشمەرگەیەکێ وان ل وێ ناڤچەیێ چاندییە.
12ێ ڤێ ھەیڤێ ب شەڤ مینەک ل ناڤچەیا سیدەکان یا سەر ب هەولێرێ ڤە تەقیابوو. ئەڤ مایین ببوو سەدەما شەهیدبوونا پێشمەرگەکێ و بریندار بوونا پێشمەرگەیەکێ دی.
گەلێ ناڤچەیێ و پەرپرسێن هێزێن پێشمەرگە ژی دیار کربوو کو ئەڤ مینە ژ لایێ پەکەکێ ڤە ھاتییە دانان. دوهـی ھەپەگێ کو هێزا چەکدارا سەر ب پەکەکێ ڤەیە داخویانییەک لی سەر ڤی مژارێ دا.
ھپگ د دەستپێکا داخویانییا خوەدا گۆت کو ڤێ مینێ چ پەیوەندی ب مەڤە نینە. لێ د بەردەوامیا داخویانییا خوە دا دانپێدان کر و گۆت “مە سالا 2019-2020ێ ل دژی ئۆپەراسیۆنا ئارتەشا ترکیێ ئەڤ مینە دانینە ڤێ ھەرێمێ” پەکەکێ ھەمان دەم د داخویانییا خوەدا راگھاند کو ئەڤ هەرێمە بەرێ ژ لایێ رەژیما سەدام ڤە ھاتییە مینرێژکرن.
پەکەکە ھەر چەند ئیددیعایێ بکەت کو ئەڤ مینە ژ بۆی ئارتەشا ترکیا ھاتینە دانین ژی ئەڤ یەک نە راستە. ژ بەر کو جیھێ مین لێ تەقیای نێزیکی گوندێ بێرکیمەیە و تەنێ 1 کم ژ گوندی دوورە. ھەمان دەم ئەو رێیا کو مین ل سەر تەقییایە رێیەکە کو گوندی ب کار تینن و گوندی دەستپێکا بھارێ تەرش و تەوالێ خوە دبەن ڤان جیھان. یانی پەکەکێ جیھێ کەسێن مەدەنی مینرێژ کریە.
پەکەکە ئیددیعا دکەت کو ئەڤ مینە ژ بۆی ئۆپەراسیۆنا ترکییا ھاتینە دانین. لێ بەلێ ئەڤ رێیە نە رێیا عەسکەرێ ترکیا یە. جهێ کو ترکیا تێدایە چییایێ شەکیفە. هەگەر مرۆڤ بخوازیت ژ جھێ ھاتییە مینرێژکرن ب پییا بچیتە چیایێ شەکیف کو ترکیا لێ هەیە ھەری کێم پێدڤی ب 20 دەمژمێرا هەیە. ئەڤ یەک ژی ئاشکەرا دکەت کو ئەڤ مینە، نە ژ بۆی عەسکەرێن ترک بەلکو ژ بۆی گەڵێ هەرێمێ و پێشمەرگەیان ھاتییە دانین.
پەکەکێ ھەر چەند ب نە راستەوخۆ گۆتبیت ژی، لێ مین دانینا ل سەر رێیێن ئینسانێن مەدەنی تاوانەکا مرۆڤاتی یە.
پەکەکێ ل سالا 2006ێ “پەیمانناما قەدەغەکرنا مینێن دژە-مرۆڤان” ل گەل جێنەوا کال ئیمزا کریە. واتە ئەڤە قەبوول کرییە کو مینا نادانیتە سەر رێیا سڤیلان و حەتا عەسکەران ژی. دییارە دەما کو پەکەکێ ئەڤ پەیمانە ئیمزا کری گەلێ کورد و کوردستان دەرڤەی ڤێ پەیمانێ گرتیە. ژ بەر کو پەکەکە مینا تەنێ ل سەر رێیێن هەرێما کوردستان دچینیت.
نها پەکەکێ ئەڤ مینە دانانە، ئەڤە ب ئاوایەکێ نە مباشر تاوانەکە. پێدڤیە لایەنێن پەیوەندیدار ڤێ یەکێ بگەھیننە جێنەوا کال و حەساب ژێ بهێتە خواستن. ژ بەر کو مینێن پەکەکێ نە جارا یەکێ یە کو زیانێ دگەھیننە کەسێن مەدەنی.
