ل عەین عیسایێ شەرەکێ گران د ناڤبەرا هه‌سه‌دێ و کۆمێن چەکدار دا دەرکەت
ل نێزیکی گوندێ مەلاق ل رۆژئاڤایێ عەین عیسایێ، ل سەر رێیا ناڤدەولەتی M4ێ، شەرەکێ گران د ناڤبەرا شەرڤانێن هه‌سه‌دێ و چەکدارێن ئۆپۆزیسیۆنا سووریێ یێن ترکیە پشتەڤانیا وان دکەت، دەرکەت.
ل گۆر نه‌رینگه‌ها سووری یا مافێن مرۆڤان، پشتی کو چەکدارێن سەر ب ترکیێ ڤە ھەول دان دەرباسی بارەگەھێن هه‌سه‌دێ ل عەین عیسایێ ببن، شەرەکێ گران د ناڤبەرا ھەردوو ئالییان دا ل نێزیکی گوندێ مەلاق ل رۆژئاڤایێ عەین عیسایێ دەرکەت.
نه‌رینگه‌هێ دەستنیشان کر، ھەژمارەک کوشتی و برینداران ژ ھەردوو ئالییان ھەنە.
دەمەکە کۆمێن چەکدارێن سەر ب ترکیێ ڤە، ئێریشێن خوە ل سەر ناڤچه‌یا عەین عیسایێ زێدە کرینە، هه‌سه‌ده ژی دبێژە، ئەم بەرسڤا وان ئێریشان ددن و ناھێلن ترکیە و چەکدارێن سەر ب وێ ڤە ب پێش ڤە بێن.
ناڤچه‌یا عەین عیسایێ ل باشوورێ رۆژھلاتێ کۆبانیێ، ل سەر رێیا ناڤدەولەتی M4ێ دکەڤە، پشتی ئێریشا ترکیێ و کۆمێن چەکداران ڤە، ھن ھێزێن رژێما سووریێ و رووسیایێ ل دەردۆرا وێ ناڤچه‌یێ ب جھ بوونە.
