دۆزگه‌رییا تركیێ: ته‌ندروستییا ئاپۆ پڕ باشه‌، ئه‌و نه‌مرییه‌

دۆزگه‌رییا ده‌وله‌تا تركیێ راگه‌هاند؛ عه‌بدوللا ئۆجالان رێبه‌رێ زیندانكری یێ په‌كه‌كێ ل ئیمرالیێ یه‌، ته‌ندروستییا وی پر باشه‌، ئه‌و ساخه‌ و نه‌مرییه‌.

ل رۆژێن رابووری هات ئیدیعا كرن كو ئاپۆ د زیندانێ دا‌ مرییه‌ و ده‌وله‌تا ترك مرنا وی راناگه‌هینیت، ئه‌ڤ یێك ب ئاوایه‌كی له‌زگین و به‌رفره‌هـ د سۆسیال مه‌دیایا تركیێ دا هات پارڤه‌كرن و نیقاش ل سه‌ر گوڕ ببوو.

پاش ڤێ ئیدیعایێ، پارێزه‌رێن ئۆجالان ژ بۆ هه‌ڤدیتنا وی سه‌ردانا دۆزگه‌رییا ده‌وله‌تێ كرن و خواستن كو ئۆجالان ببینن، پارێزه‌ران ژ دۆزگه‌ریێ را گۆت: ته‌ك رێیا كو ئه‌م پشتراست ببن كو ئۆجالان دژیانێ دا‌ مایه‌، هه‌ڤدیتنا راسته‌ راسته‌.

د ڤێ ده‌ربارێ دا، دۆزگه‌رییا گشتی یا پارێزگه‌ها بۆرسایێ داخویانی پارڤه‌كر و تێدا ئه‌شكه‌ره‌ كر، عه‌بدوللا ئۆجالان رێبه‌رێ زیندان كری یێ په‌كه‌كێ د زیندانا ئیمرالیێ دا یه‌ و ته‌ندروستییا وی پر باشه‌، نووچه‌یێ وه‌فاتا وی تو گرێدانه‌كا وێ ب راستیێ ڤه‌ نینه‌.

دۆزگه‌ریێ ده‌ست نیشان كر، ل رۆژێن رابووری ئاگاهی ل سۆسیال مه‌دیایێ هاتن ئیعلان كرن كو ئۆجالان وه‌فات كرییه‌، لێ به‌لێ ئه‌ڤ یێك ده‌ره‌وه‌ و ئۆجالان نه‌مرییه‌.

هێژای گۆتنێ یه‌، عه‌بدوللا ئۆجالان ل 15ی شوباتا سالا 1999ێ ژ هێلا دوله‌تا تركیێ ڤه‌ هات ده‌سته‌سه‌ر كرن، هێژان ئه‌و د باله‌فرێ دا‌ بوو وه‌ختا ژ ئه‌فسه‌رێن ئیسخباراتێ را‌ گۆتی: «ئه‌ز ئاماده‌مه‌ خزمه‌تێ بكه‌م»، پشتره‌ و دیه‌كه‌م روونشتنا مه‌حكه‌مێ دا‌ داخوازا عه‌فۆیێ ژ دایكێن عه‌سكه‌رێن ترك كر ئه‌و عه‌سكه‌رێن ب ده‌ستێ گه‌ریلایان هاتینه‌ قه‌تل كرن و پشتره‌ ژ دادوه‌ر را گۆت: «دایكا من تركه‌، ئه‌ز ژ تركیێ حه‌ز دكه‌م، هه‌گه‌ر هوون ده‌رفه‌تێ بده‌ن، ئه‌ز ئاماده‌مه‌ خزمه‌تا ده‌وله‌تێ بكم».

رێخستنا په‌كه‌كێ هه‌یا نها ژی ژ بۆ ڤه‌شارتنا و گوهه‌رتنا ڤان ئاخافتنێن ئاپۆ هه‌ولێن مه‌زن دده‌ت‌، لێ به‌لێ ئه‌ڤ یێك ژ ده‌ستێ وان ده‌ركه‌تییه‌ و ئێدی هه‌ر كورده‌ك باش دزانیت كانێ ئاپۆ چ روو ره‌شییه‌ك ژ بۆ خوه‌ و رێخستنا خوه‌ ل همبه‌ری دادوه‌رێ ترك تۆمار كر.