راکان سەعید عەلی جبووری پارێزگارێ سەپاندی یێ کەرکووکێ، داخوازێ ژ ئەنجوومەنا وەزیرێن ئیراقێ دکەت یەک ژ کەسێن نێزیکی وی ژ یاسایا لێپرسین و داوەریێ بهێتە بەخشین داکو بکاریت وەکو رێڤەبەرێ بالەفرخانەیا کەرکووکێ ئەرکدار ببیت.
چاڤکانیێن تایبەت یێن پێگەها دارکا مازی ل بەغدایێ ئاشکەرا کرن، راکان جبووری کو پشتی خانەتا 16ێ جۆتمەهێ ژ لایێ حکوومەتا ئیراقێ وەکو پارێزگارێ کەرکووکێ هاتە دەستنیشانکرن، ب نڤیسارەکا نهێنی ل رۆژا 13/10/2020ێ، داخواز ژ ئەمیندارێ گشتی یێ ئەنجوومەنا وەزیرێن ئیراقێ کریە یەک ژ کەسێن عەشیرەتا وی ژ یاسایا لێپرسین و دادوەریێ بهێتە بەخشین.
چاڤکانیێن دارکا مازی هەر وەها ئاشکەرا کرن ئەڤ نڤیسارە ب هەژمارا 2781 ل رۆژا 13/10/2020ێ ژ بۆی ئەنجوومەنا وەزیرێن ئیراقێ هاتیە شاندن و تێدا پارێزگارێ سەپاندی یێ کەرکووکێ داخواز دکەت “د. زیاد حسین سالح مەحجووب” ژ یاسایا لێپرسینێ بهێتە بەخشین داکو بکاریت پۆستێ رێڤەبەرێ بالەفرخانەیا ناڤدەولەتی یا کەرکووکێ وەرگریت.
د. زیاد حسین سالح مەحجووب نها وەکە فەرمانبەر ل دیوانا پارێزگەها کەرکووکێ ئەرکدارە، ل گۆر زانیاریان پێش نها ئەو ب هندەک کارێن نە یاسایی و گەندەلیێ هاتیە تاوانبارکرن، ژ بەر ڤێ یەکێ ژی راکان جبووری دخوازیت ئەڤ کەسە ژ یاسایا لێپرسین و دادوەریێ بهێتە بەخشین، راکان جبوری ب خوە ژی ب هندەک دۆسیەیێن گەندەلی و خوارنا مولکێ گشتی هاتیە تاوانبارکرن، لێ هەیا نها هیچ لێپرسینەک د گەل وی دا نەهاتیە کرن.
پشتی کو راکان جبووری وەکو پارێزگارێ کەرکووکێ هاتی دەستنیشانکرن، ب هەموو ئاوایەکی هەول ددەت کەسێن سەر ب عەشیرا خوە ل پۆستێن بلند یێن حکوومی ل پارێزگەها کەرکووکێ ئەرکدار بکەت، ئەڤە ژ ئالیەکێ، ژ ئالیەکێ دی ب هەموو ئاوا دژاتیا کوردێن ل کەرکووکێ دکەت و ب ئاوایێن جوودا گڤاشان ل سەر وان چێدکەت داکو ژ کەرکووکێ دەرکەڤن و هەژمارا کوردان ل کەرکووکێ کێم ببن و هۆزێن عەرەب ل جیهێ کوردان بجیهـ دکەت.
