رێڤەبەرێ ناحیا قەسرێ یا باژارۆکێ چۆمان ل ھەرێما کوردستانێ راگھاند، 14 گوندێن وێ دەڤەرێ ژ لایێ پەکەکێ ڤە ھاتینە داگیرکرن ژ بەر وێ ژی ئەو نکارین خزمەتگوزاریا بگەھینن وان.
رێڤەبەرێ ناحیا قەسرێ، فەیسەل ئالانی ژ بۆ باس نیۆزێ داخویانی دا و گۆت، ل دەڤەرا مە 14 گوند ژ لایێ پەکەکێ ڤە ھاتنە داگیرکرن. ئەڤە ژی بوویە سەبەب کو ئەم نەکاربن ب رەنگەکی پێویست خزمەتا خەلکێ وان گوندان بکین.
فەیسەل ئالانی ھەر وھا گۆت، حکوومەت دخوازیت پرۆژەیێن نوو ل وان گوندان پێک بینیت لێ ژ بەر پەکەکێ ئەڤ دەرفەت نەمایە.
رێڤەبەرێ ناحیا قەسرێ دا خویاکرن ژی، ژ خوە ھەر سال ژ بەر ھەبوونا پەکەکێ، فرۆکەیێن شەر یێن ترکیێ دەڤەرێ بۆردوومان دکەن و خەلکێ سڤیل دبنە قوربانی و زیانەکا مەزن ل گوندان و دەڤەرێ ژی دکەڤیت. بلا پەکەکە ژ دەڤەرێ دەرکەڤیت و ئێدی بەھانەیان نەدەتە دەستێ ترکیێ.
