بۆ کۆلانا تۆنێلا ل چیایێ شەنگالێ پەکەکێ موەلیدا تاخەکێ دزی

چەکدارێن پەکەکێ ل شەنگالێ موەلیدەیا کەهرەبایا تاخەکێ باژارۆکێ شنگالێ دزین داکو بکارن ب وێ موەلیدەیێ ل چیایێ شەنگالێ تۆنەلەلان لێ بدەن.

چاڤکانیێن پێگەها دارکا مازی ل شەنگالێ ئیرۆ رۆژا پێنج شەمی 18/3/2021ێ راگهاند، سەرحەد ئامانووس یەک ژ بەرپرسیارێن پەکەکێ ل باژێرۆکێ شەنگالێ ل رۆژا 1/2/2021ان دەست دانیە سەر موەلیدەیا کەهرەبایا تاخێ ئەل-نەسر یا باژێرۆکێ شنگالێ و دخوازیت ڤەگوهێزیتە یەک ژ بارەگەهێن پەکەکێ ل چیایێ شەنگالێ داکو بکارن د کۆلانا تۆنەلان دا بکار بینن.

چاڤکانیێن پێگەها مە ل شەنگالێ هەر وەها ئاشکەرا کرن، ئەڤ موەلیدە و 8 یێن دی، ب نڤیسارەکا فەرمی یا شارەداریا شەنگالێ ژ بۆی زێدەکرنا ساعەتێن کەهرەبایێ ل شەنگالێ هاتینە دابین کرن.

ئەڤ کارێ پەکەکێ د دەمەکێدایە کو کەهرەبایا شەنگالێ د رەوشەکا گەلەک خراب دایە و دهێتە چاڤەرێکرن د وەرزێ هاڤینێ دا ئەڤ رەوشە خەرابتر ببیت و ساعەتێن پیدانا کەهرەبایێ کێمتر ببن.