پشتی خیانەتا 16ێ ئۆکتۆبەرا سالا 2017ێ و داگیرکرنا کەرکووکێ ژ لایێ سوپایێ ئیراقێ و میلیشیایێن حەشدا شەعبی یا ل ژێر هەژموونا ئیرانێ دا، رەوشا ڤی باژێرێ کوردستانێ هەر کو دچیت خرابتر دبیت و خەلکێ کورکووکێ ب هەموو نەتەوەیێن خوە ڤە د فەوزایێ دا دژین.
چاڤکانیێن پێگەها دارکا مازی ل کەرکووکێ راگهاندن، ل 26/1/2021ێ ژ لایێ رێڤەبەریا ئیستخبارات و ئاسایشا کەرکووکێ ڤە یەک ژ چەکدارێن سەر ب حەشدا شەعبی “هێزا ئەمامین” د ناڤا باژێرێ کەرکووکێ دا ب سووچا گەف خوارن و ب زۆر پارە وەرگرتن ژ خەلکی هاتیە دەستەسەرکرن، د دەما لێپرسینێ دا دانپێدان کریە و راگهاندیە دو کەسێن دی یێن ب ناڤێن “محەمەد سالح علی جاسم و سوفیان ریاز احمد علی” د ڤی کاری دا د گەل وی دا بوون.
گەلۆ تاوانا وان چی یە؟
چاڤکانیێن پێگەها دارکا مازی هەر وەها ئاشکەرا کرن، ل 4/1/2021ان تاوانبار “سەباح خەلەف مەحموود” ل گەل تاوانبار “محەمەد سالح عەلی” رابوونە ب فرێدانا بۆمبەیەکا دەستی ژ بۆ ناڤا مالا هەموەلاتی “ئەسعەد حەمید حەمدی” کو مالا وی دکەڤیتە سەر رێیا د ناڤبەرا بەغدا و کەرکووکێ دا، ئەڤ هەموەلاتیە خوەدی ئاشەکی ب ناڤێ “ئەلمیساق”ە ل باژێرێ کەرکووکێ.
پشتی هاڤێتنا بۆمبەیا دەستی ب تەلەفۆنێ گەف ل خوەدانێ ئاشی کرینە کو گەر 30 هەزار دۆلارێن ئەمەریکی نەدەن وان ئەو دێ کورێ وی کوژن، لێ بەلێ، ژ بەر کو ئەسعەد پارە نەدان وان، دیسا “محەمەد سالح عەلی” و “سوفیان ریاز ئەحمەد” بۆمبەیەک دی هاڤێتیە ناڤا مالا ڤی هاولاتی.
تاوانبار “سەباح خەلەف مەحموود” کەسێ سەرەکی بوویە د ڤی گرووپی دا، ئەو عەرەبە، ناڤێ دایکا وی “عەلیە مدید وەسمی”یە و ناڤێ هەڤژینا وی “نەجوەد ئەحمەد عەبدللا”یە، روونشتڤانێن تاخا عەمەل شەعبی نە ل باژێرێ کەرکووکێ، چەکدارێ حەشدا شەعبی یە و هەر وەها ل ئاشێ “ئەل-میساق” کار دکەت.
ژ لایێ بارەگەها سەرکرداتیا ئۆپەراسیۆنێن هەڤبەش یێن کەرکووکێ ب نڤیسارا فەرمی یا هەژمارە “3797 ل رێکەفتی 14/9/2020ێ” رێ ب ڤی کەسی هاتیە دایین کو چەکێ کەلاشینکۆف هەلگریت، د ڤێ نڤیسارێ دا داخواز هاتیە کرن ل زالگەهان ئاسانکاری ژ بۆی وی بهێنە کرن د دەما هاتن و چوویینێ دا.
پشتی 16ێ ئۆکتۆبەرا سالا 2017ێ کەرکووک کەتیە رەوشەکا هەری خەراب دا و رۆژانە گەلێن ل کەرکووکێ دژین ب گشتی و کورد ب تایبەتی راستی پرسگرێکێن هەری مەزن تێن، نە جانێ وان و نە ژی مالێ وان هیچ پاراستنەک ل سەر نینە، رەوش گهایە ئاستەکی هەری خەتەر، ب ئاوایەکێ کو نها نە ب تەنێ کورد بەلکو هەموو نەتەوەیێن دی یێن وەکو عەرەب و تورکمان ل کەرکووکێ داخوازا ڤەگەرینا هێزا پێشمەرگەیێن کوردستانێ ژ بۆی ڤی باژاری دکەن.
