پارتی و تەڤگەرێن سیاسی یێن کورد ل باکوورێ کوردستانێ ل سەر نەورۆزێ پەیامەک ھەڤبەش بەلاڤ کر و داخوازا یەکبوون و ھەڤگرتنێ ژ کوردان کرن.
پەسەکێ، تەڤگەر، پاک، پەدەکە-باکور، پێلکورد ب ھەلکەفتا جەژنا نەورۆزێ پەیامەک ھەڤبەش بەلاڤ کر. ناڤەرۆکا پەیامێ وھایە:
“ئەم ئاگرێ نەورۆزێ ژ بۆ یەکێتی و یەکرێزییێ گور بکن!
وەک ئەم دزانن مەھا ئادارێ ب رۆژێن کێفخوەشی و سەرکەتنێ و ب رۆژێن خراب و تراژەدییان د دیرۆکا کورد و کوردستانێ دا جھەکێ گرنگ دگریت. یەک ژ وان رۆژان ژی 21ێ ئادارێ رۆژا نەورۆزێ یە. لێ مخابن ئیسال ژی نەتەوا کورد نەورۆزێ د رەوشەکا ئاوەرتە دا پیرۆز دکەت. ئەگەر کۆڤید-١٩ ئاستەنگا سەرەکی بیت، ئاستەنگا دی ژی قەدەغە و زەختێن دەولەتا ترکیایێ نە.
بێگومان نەورۆز سەرسالا ھەموو نەتەوەیێن ئاریانی یە. لێ ژ بۆ کورد و کوردستانییان جەژنا نەورۆزێ خوەدییێ جییەکێ تایبەتی یە. کورد و کوردستانی ھەم وەک جەژنەکێ، ھەم ژی وەک رۆژا سەرھلدان، بەرخوەدان و تەکۆشینا ژ بۆ ئازادی و سەرخوەبوونێ پێشەوازییا نەورۆزێ دکن. ژ بەر ڤێ یەکێ یە، دەولەتێن داگیرکەر پیرۆزکرنا نەورۆزێ قەدەغە دکەن.
گاڤا دیتن کو نکارن پێشییا پیرۆزکرنا نەورۆزێ بگرن؛ ڤێ جارێ ژی خواستن بکن مالێ خوە. ب ھەلوەست و کریارێن خوە خواستن پیرۆزکرنا نەورۆزێ ژ ئارمانج و مەقسەدا وێ یا بنگەھین دوور بێخن و ناڤەرۆکا پیرۆزکرنێ سڤک و بێ واتە بکن. دەولەتێن داگیرکەر و ھندەک ھێزێن دی دخوازن پیرۆزکرنا نەورۆزێ ژ زەمان و مەکانێن گرانبھایی یێن دیرۆکا نەتەوەیا کورد دوور بێخن و پیرۆزکرنێ شۆلی و ئالۆز بکن.
ببیرئانین و پیرۆزکرنا نەورۆزێ، د زەمانێ خوە دا و ب ئارمانجا خوە، دژی داگیرکەری، زولم و زۆرداریێ بوویە سەمبۆلا بەرخوەدانا نەتەوەیی. ھەروەھا ل دژی ئینکار و ئاسیمیلاسیۆنێ، بوویە ئامۆرەیا گەشکرن و نووژەنکرنا مێژوو و حافزەیا کوردستانی.
نەورۆز ئیرۆ ل باشوورێ کوردستانێ ب ئازادی دهێتە پیرۆزکرن. ب ڤێ مناسەبەتێ ژی نەورۆز دبیتە دەرفەتا شاھی و گەشکرنا ھشمەندی و بدەستخستنێن کوردستانی. ل رۆژئاڤایێ کوردستانێ ل ھندەک باژێران پیرۆز کرنا نەورۆزێ ژ بەر ھەلوەست و ئێریشێن داگیرکەران قەدەغەیە. ل باکور و رۆژھەلاتێ کوردستانێ مخابن هێژان ژی نەورۆز ب رەنگ و دەنگێن ئازاد و ب ئارمانجێن خوەیێن سەرەکی نایێ پیرۆز کرن.
دەولەتا ئیسلامی یا ئیرانێ سالا بۆری ل گەلەک جییێن رۆژھلاتێ کوردستانێ پیرۆزکرنا نەورۆزێ قەدەغە کربوو و ئیسال ژی ب ئیحتمالەک خورت دێ وەھا بیت. لێ ئەو نکارن ل سەر ڤین و ھەستا نەتەوەیا کورد ببنە خوەدی بریار. ئاگرێ نەورۆزێ کو سەمبۆلا ئازادییێ یە، دێ ل رۆژھەلاتێ وەلاتێ مە بلند و گوور ببیت.
ل باکورێ کوردستانێ دەولەتا داگیرکەر ب ھەموو ئیمکانێن خوە دێ ھەول دەت کو پێشییا پیرۆزکرنا نەورۆزێ ئاستەنگ بکەت. لێ پێویستە کو ل باکورێ کوردستانێ نەورۆز ب ئارمانجا خوە و د دەما خوە دا، ژ بەر سەدەمێن کۆڤید-١٩ کێم بیت ژی، ب ئاوایێن جودا بھێتە پیرۆز کرن. ل باکورێ کوردستانێ پیرۆزکرنا نەورۆزێ دڤێت ببیتە ئەگەرا گەشەپێدانا ئاخافتنا ب زمانێ خوە. ھەروەھا ببیتە پلاتفۆرما بدەستخستنا مافێن نەتەوەیی، جڤاکی و چاندی و ھەروەھا ببیتە قادا بدەستخستنا مافێ چارەنڤیسینا ملەتێ کورد.
کوردستانییێن ھێژا!
رۆژھەلاتا نێزیک و ناڤەراست د ناڤا گوھەرینێن بەرچاڤ دا نە و ناڤەندا گوھەرینان بێ شک دێ کوردستان بیت. ھێزێن داگیرکەر ئێدی وەک بەرێ نکارن سەروەرییا خوە بمەشینێن و نەتەوا کورد د بن نیرێ کۆلەتییێ دا بگرن. گوھەرتنا ھەڤسەنگیا ھێزێن ھەرێمێ و یێن زلھێزێن جیھانێ ژ بۆ دۆزا ئازادیا کورد و کوردستانێ دەرفەتێن نوو پەیدا دکەت و زەمینێ خوەشتر دکەت.
ئەڤ کێس و دەرفەتا کو د رۆژەڤا کوردستانێ دا بوویە دییاردەیا سەرەکی، گرنگییا یەکێتی، ھەڤکاری و یەکرێزییا نەتەوەیی یا کورد و کوردستانییان زێدەتر فەرز دکەت. کورد تەنێ ب ھەڤگرتن و یەکرێزییا نەتەوەیی دێ کارن دەستکەفتی یێن خوە بپارێزن و دێ ژ بۆ ئازادی و سەرخوەبوونا کوردستانێ پێنگاڤێن بریاردێر باڤێژن.
ل باشوورێ کوردستانێ ژ بۆ پاراستنا دەستکەفتی یێن فەدەرال، ژ بۆ ئاڤاکرن، یەک کرن ، خورت کرن و پێشدەبرنا دەزگەھێن دەولەتبوونێ و ژ بۆ رێلبەرخوەشکرنا ئازادی و سەرخوەبوونێ، بەریا ھەر تشتی دڤێت یەکرێزی و ھەڤگرتنا ھەموو پارتییێن سییاسی یێن کوردستانی بهێتە خورت کرن.
ل رۆژھلاتێ کوردستانێ ژی دەستپێکا سەرکەفتنێ، د یەکرێزییا ھێزێن نەتەوەیی یێن ل ڤی پارچەیا وەلاتێ مە دا دەرباس دبیت.
ل باکورێ کوردستانێ ژ بۆ رێلبەرگرتنا شکەستا ھشمەندییا نەتەوەیی، نشتمانی، ژ بۆ ھووناندن و گەش کرنا بیر و باوەرییا ئازادی، رزگاری و سەرخوەبوونێ گاڤا یەکەم ئەوە کو ھەموو ھێزێن نەتەوەیی، کوردستانی دەست بدەن ھەڤ و ژ بۆ بھەڤرا خەبات، ھەڤکاری و تفاقێن نەتەوەیی، نیشتمانی گاڤان باڤێژن.
ب مناسەبەتا پیرۆزکرنا نەورۆزێ دڤێت ئەم ھەولدانێن یەکێتی، ھەڤکاری و یەکرێزییا نەتەوەیی گەش بکین. دڤێت ئەم پاراستن و ڤەژاندنا ھشمەندی و دەستکەفتی یێن نەتەوەیی دەرخین پێش.
بژی نەورۆز، سەمبۆلا بەرخوەدان و تەکۆشینا ئازادی و سەرخوەبوونێ!
بژی یەکرێزییا نەتەوەیا کورد و کوردستانییان!
20/3/2021
“پەسەکە، تەڤگەر، پاک، پەدەکە-باکور، پێلکورد”
