وەزارەتا پێشمەرگە راگھاند کو ل “ھەرێمێن ناکۆک” ژ بەر ڤالاھیا ئەولەھیێ و گەفێن داعشێ 60 گوندێن گرێدایێ خانەقینێ ھاتنە ڤالاکرن.
جیگرێ سەرفەرماندارێ پێشمەرگە قەھرەمان شێخ کەمال دیار کر ل ھەرێمێن کوردستانی یێن ل دەرڤەیی ئیدارەیا ھەرێما کوردستانێ کو ب “ھەرێمێن ناکۆکی ل سەر” تێنە ب ناڤکرن، چالاکیێن داعشێ زێدەبوونە.
کەمال گۆت ل ھەرێمێن سنۆری یێن د ناڤبەرا پێشمەرگە و ئارتێشا ئیراقێ دا، ژ بەر ڤالاھیا ئەولەھیێ ھەر کو دچیت گەفێن داعشێ زێدەتر دبن و وھا بەردەوام کر “ژ بەر ڤێ یەکێ 60 گوندێن د ناڤ سنۆرێ خانەقینێ دا نەچار مانە کو ڤالا بکەن.”
فەرماندارێ پێشمەرگە دبێژیت ئارتێشا ئیراقێ باش تەدبیران وەرناگریت و داعشێ ل چیایێن قەرچۆخێ، مەخموور و کەرکووکێ ستارگەھێن مەزن چێکرنە.
ھەروھا شێخ کەمال دیار کر کو ل گۆری رێکەفتنا د ناڤبەرا پێشمەرگە و ئارتێشا ئیراقێ دا دڤێت ل دیالا، کەرکووک، مووسل، مەخموور، ھەولێر و بەغدایێ ناڤەندا ئۆپەراسیۆنا هەڤبەش بهێتە دامەزراندن و گۆت “ژ بۆ ھەرێمێن کو ڤالاھیا ئەولەھیێ تێدا هەیە، تەڤگەرەک هەڤبەش پیدڤی و گرنگە. د دەربارێ ڤێ مژارێ دا چەندین جارا مە ئامادەبوونا خوە دیار کر لێ ھێزێن ئیراقی سەمیمیەتێ نیشان نادەن.”
فەرماندارێ ھێزێن ئەنیا گوێر و مەخموورێ سیروان بارزانی راگھاند کو داعش سوودێ ژ لاوازیا ئەولەھیێ وەردگریت و گۆت “د ڤێ مژارێ دا دڤێت گلەیی ژ ئالیێن ئیراقی بێنە کرن. تەڤی رێکەفتنەکا هەڤبەش د گەل ھێزێن پێشمەرگە دا هەڤکاریەکا باش ناکەن.”
وەزارەتا بەرەڤانیا ئیراقێ د 21ێ ئادارا 2021ێ دا راگھاندبوو کو د 10 رۆژێن داویێ دا 133 ئارمانجێن داعشێ ھاتنە بۆردۆمانکرن، د ئەنجامێ دا 61 ستارگەھ و 25 شکەفت هاتنە ژناڤبرن.
