پەکەکێ ئەڤجارە ب زمانێ عەرەبی بریارا شەرکرنێ دا

پەکەکێ ئەڤجارە ب زمانێ عەرەبی بریارا شەرکرنێ دا

وەکو هەرجار پەکەکێ ب دارێ زۆرێ و ب کۆمکرنا هندەک کەسان ل سەر ناڤێ گەلێ شنگالێ داخویانەیەک بەلاڤکر و د ڤێ داخویانیێ دا ژی وەکو هەرجار ب بەهانەیا شەرکرنا ل دژی پەدەکێ گەف ل حکوومەتا هەرێما کوردستانێ و حکوومەتا فەدەرال یا ئیراقێ کرن.

پەکەکێ ب کۆمکرنا هندەک کەسان ھەلوەستا خوەیا دەربارێ بریارێن حکوومەتا ئیراقێ و دەرکەتنا هێزێن پەکەکێ ل شەنگالێ ئاشکەرا کر. پەکەکێ ل سەر ناڤێ گەلێ شنگالێ راگھاند، حکوومەتا کازمی ل سەر وان فەرز دکەت، یەبەشە و ئاساییشا ئێزیدخانێ کو دو هێزێن نە یاسایی و سەر ب پەکەکێ ڤە نە شەنگالێ تەرک بکەن. ل بەرامبەر ڤان بریارێن حکوومەتا ئیراقێ و د چارچۆڤەیا رێکەفتنا بەغدا-هەولێرێ دا هاتینە دەرکرن، پەکەکێ گەفا شەرکرنێ ل دژی حکوومەتا هەرێمێ و حکوومەتا فەدەرال یا ئیراقێ کر و راگهاند ب چ ئاوا ئەو ب رێکەفتنا د ناڤبەرا حکوومەتا هەرێما کوردستانێ و حکوومەتا ئیراقێ رازی نابن.

هەر وەها پەکەکێ د ڤێ داخویانیێ دا کو ل سەر ناڤێ گەلێ شنگالێ ب یەک ژ ئالیگرێن خوە دایە خواندن راگهاند، مە ھەیا نھا ھەر رێبازا چارەسەریێ ئەساس گرتیە و ژ حکوومەتا ئیراقێ ژی داخواز دکەین، رێیا شەرکرنێ نە هەلبژێریت. ئەم ژ تەھدیدێن وان ناترسین! لێ ئەگەر مۆکر بن ل سەر شەرکرنێ، ئەم ژی دێ بەرخوەدانێ کەین! ب ڤێ یەکێ ب ئاوایەک راستەراست پەکەکێ دژاتیا خوە ژ بۆی لهەڤهاتنا هەولێر-بەغدایێ نیشان دا.

پەکەکێ وەکو هەر جار راگهاند، ئەڤ بریارێن حکوومەتا فەدەرال یا ئیراقێ ل سەر داخوازا پەدەکێ و ترکیێ هاتنە دایین، ب ڤێ یەکێ پەکەکە ب تەنێ دخوازیت رەواتیێ بدەتە هەبوونا خوە یا د شەنگالێ دا، داکو رێکێ ل بەر ئێریشا ترکیێ ژ بۆی داگیرکرنا شەنگالێ خوەش بکەت، وەکو چەوا ئەڤ کارە ل ناڤچەیێن دی یێن وەکو ناڤچەیێن سینۆری یێن باکورێ کوردستانێ و چیایێ حەفتەنینێ ژ بۆی ترکیێ ئەنجام دای و ئەو دەر هەموو خستیە بن دەستهلاتداریا ترکیێ دا.

د ڤێ داخویانیێ دا کو یەک ژ لایەنگرێن پەکەکێ یێن ل شەنگالێ ب ناڤێ ریحام هچۆ خواند، پەکەکێ گەفێن راستە راست ل حکوومەتا ئیراقێ و حکوومەتا هەرێما کوردستانێ کرن و خوەیا کر ب هیچ ئاوایەکێ ل شەنگالێ دەرناکەڤیت، ئەڤ یەک ژی ژ ئالیێ شەهرەزایێن سیاسی وەکو هلکرنا گلۆپا کەسک ژ بۆ ئێریشا دەولەتا داگیرکەر یا ترکیێ ژ بۆی سەر شەنگالێ دهێتە شرۆڤەکرن.

هێژایی گۆتنێ یە ل 9ی تشرینا یەکێ یا سالا 2020ێ لهەڤهاتنەک د ناڤبەرا حکوومەتا هەرێما کوردستانێ و حکوومەتا فەدەرال یا ئیراقێ دا دەربارا ئاسایی کرنا رەوشا شەنگالێ و ڤەگەرینا شەنگالیێن د ناڤا کامپان دا ژ بۆی شنگالێ و دەرکەتنا هەموو هێزێن میلیشیا و نە یاسایی د ناڤا شەنگالێ دا هاتبوو ئیمزاکرن، لێ ژ وێ رۆژێ هەیا نها حەشدا شەعبی و حەشدا ئاپۆیی “پەکەکە” ب هەموو ئاوایەکی دژاتیا ڤێ رێکەفتنێ دکەن.

پوستێن ھەمان بەش