ب ناڤبێنکاریا رووسیایێ، ھێزێن سووریەیا دەمۆکراتیک (ھەسەدێ) و کۆمێن چەکدارێن سەر ب ترکیێ ڤە تەرمێن کوشتیا ب ھەڤ گوھارتن.
رەوانگەھا سووری یا مافێن مرۆڤان بەلاڤ کر، ب ناڤبێنکاریا ھێزێن رووسی، ھێزێن ترکیێ تەرمێ 7 شەرڤانان رادەستی ھەسەدێ کرن کو د رۆژێن بۆری دا د ئێریشەکا چەکدارێن سەر ب ترکیێ دا ھاتبوون کوشتن.
رۆژا 14ێ ئادارێ چەکدارێن سەر ب ترکیێ ڤە ئێریشی سەر گوندێ دبسیێ کربوو، ئەڤ گوندە ب دووراتیا 4 کیلۆمەتران دکەڤیتە باکورێ عەین عیسایێ، ل گۆر زانیاریێن رەوانگەھێ ژی، د ئێریشێ دا 8 شەرڤانێن ھەسەدێ ھاتنە کوشتن و چەکدار کارین 7 تەرمێن شەرڤانان لگەل خوە ببەن.
ل ھەمبەر رادەستکرنا وان 7 تەرمێن شەرڤانان، ھەسەدێ رێ دا گرووپێن چەکداران تەرمێن چەکدارێن کوشتی یێن پێش چەند رۆژان کو ل ئەردێ مانە راکەن.
رۆژێن 18 – 20ێ ئادارێ، گرووپێن سەر ب ترکیێ ڤە ئێریشی سەر گوندێن عەین عیسایێ کرن و د ناڤبەرا وان و شەرڤانێن ھەسەدێ دا شەر و پەڤچوونێن گران دەرکەتن.
ل گۆر ناڤەندا راگھاندنا ھەسەدێ، د ئێریشێن چەکداران یێن د رۆژێن 18 – 20ێ ئادارێ دا 37 چەکدارێن سەر ب ترکیێ ڤە ھاتن کوشتن.
