مەزلووم کۆبانی ل سەر ڤەگەرا پێشمەرگەیێن رۆژئاڤا ئاخڤت

 فەرماندارێ گشتی یێ ھێزێن سووریا دەمۆکراتیک (ھەسەدێ) مەزلووم کۆبانی بانگ ل ئەنەکەسێ و پەیەنکێ کر کو ھەست ب بەرپرسیاریێ بکەن و ڤەگەرنە سەر مێزا دانووستاندنێ و دیالۆگا کوردی-کوردی بەردەوام بکەن. مەزلووم کۆبانی دەربارێ مژارا پێشمەرگەیێن رۆژئاڤا دا ژی راگھاند، “دڤێت پرسا لەشکەری و پێشمەرگەیان ل گۆری پەیمانا دوھۆکێ بهێتە چارەسەرکرن.”

جەنەرال مەزلووم کۆبانی د داخویانیەکێ دا ژ بۆ ئاژانسەکا نێزیکی رێڤەبەریا خوەسەر تەکەزی ل سەر گرنگیا بەردەوامبوونا دیالۆگێن د ناڤبەرا پارتیێن یەکتیا نشتمانی یا کورد (پەیەنەکێ) و ئەنجومەنا نشتمانییا کورد ل سووریێ (ئەنەکەسێ) دا دکەت و دبێژیت، ئەو دێ پشتەڤانیا خوە بۆ دیالۆگا کوردی-کوردی بەردەوام کەن.

کۆبانی دبێژیت: “دیالۆگ و دانستاندنێن د ناڤبەرا ئەنجومەنا نشتمانییا کورد ل سووریێ و پارتیێن یەکتیا نشتمانییا کورد دا ژ بۆ یەککرنا خیتاب و ھەلوەستێ یە. وەکی لایەنەکێ گارانتۆر و سپۆنسەر ل گەل لایەنێ ئەمریکی یێن دۆست ئەم هێژان ب ھەلوەستا خوە ڤە گرێدایی نە.”

گەنەرال کۆبانی یەکرێزیا کوردی وەکو مژارەکا ستراتیژی ژ بۆ سبەرۆژا گەلێ کورد ب ناڤ کر و گۆت،”یەکیتیا کوردی ژ بۆ مە مژارەکا ستراتەژیکا خوەدی گرنگیەک ژ بۆ پاشەرۆژا گەلێ مە و داخوازا وێ یا رێخستنکرنا مالا ناڤخوەیی یە.”

فەرماندارێ گشتی یێ ھێزێن سووریەیا دەمۆکراتیک دەستنیشان کر، دڤێت ئەنەکەسە و پەیەنەکە خالێن کو ناکۆکی ل سەر ھەنە، ل سەر مێزێ گوتووبێژ بکەن نە ل سەر مەدیایێ و تەکەز کر، تۆمەتبارکرنا ھەڤدو ب رێیا مەدیایێ کەشەکێ نەرێنی چێدکەت.

تێکلداری مژارا لەشکەری یا د دانووستاندنێن ناڤبەرا ئەنەکەسێ و پەیەنەکێ دا، مەزلووم کۆبانی گۆت: “مژارێن کو ھەر دو ئالی د راگھاندنێ دا ھەڤدو پێ تاوانبار دکەن کەشەکێ نەرێنی ئافراند، ب تایبەت مژارا لەشکەری و پێشمەرگەیان کو بەرێ ھاتیە دیارکرن و ھەر چارەسەریەکا ژ بۆ ڤێ مژارێ دێ د چارچۆڤەیا پەیمانا دوھۆکێ دا بیت.

پوستێن ھەمان بەش

پەکەکە چەوا ژ خەتا مەعسووم کۆرکماز یا 15 تەباخێ، بەر ب خەتا عەڤدللا ئۆجەلان یا 15 شوباتێ ڤە چوویە؟

زانیاریێن نه‌بهیستی ده‌ربارێ «پێنگاڤا 15 ته‌باخێ» یا په‌كه‌كێ، د ڤێ زنجیره‌ ڤیدیۆیێن «داركا مازی» دا بزانن

ژ خەتا 15ێ تەباخێ ھەیا خەتا 15ێ شوباتێ؛ د ناڤ پەکەکێ دا چەک و دژواری