فەرماندارێ گشتی یێ ھێزێن سووریا دەمۆکراتیک (ھەسەدێ) مەزلووم عەبدی، ل سەر راوەستاندنا دیالۆگێن کوردی-کوردی یێن ناڤبەرا پارتیێن یەکیتیا نشتمانییا کورد (پەیەنەکێ) و ئەنجوومەنا نشتمانییا کورد ل سووریێ (ئەنەکەسێ) دۆھی 28ێ ئادارێ بانگ ل ھەردو ئالیان کربوو ژ نوو ڤە ڤەگەرن دییالۆگێ.
عەبدی بانگ ل ئەنەکەسێ و پەیەنەکێ کربوو کو ڤەگەرنە دانووستاندنان و دەستنیشان کربوو، رێکەفتنا ناڤبەرا ئالیێن کوردی ستراتەژیکە و مژارا ڤەگەرا پەشمەرگەیێن رۆژ ژی د چارچۆڤەیا پەیمانا دوھۆکێ دا دێ هێتە چارەسەرکرن.
ل سەر ڤێ بانگێ سەرۆکێ ئەنجوومەنا نشتمانییا کوردی یا ل سووریێ (ئەنەکەسێ) سعوود مەلا گۆتبوو، “بانگا مەزلووم عەبدی یا ژ بۆ دەستپێکرنا دیالۆگا کوردی-کوردی یا ل رۆژئاڤایێ کوردستانێ ئەرێنی یە و ئەو ھێڤی دکەن، ئەڤ داخویانیە داویێ ل ناکۆکیێن د ناڤبەرا ئەنەکەسێ و پەیەنەکێ دا بینیت.
مەلا دابوو زانین کو ئەو ھێڤی دکەن ب ڤان داخویانیێن مەزلووم عەبدی رووپەلەکا نوو د ناڤبەرا ئەنەکەسێ و پەیەنکێ دا ڤەبیت و ھەردو ئالی ب روحا برایەتی کار بکەن.
پەیەنەکێ ژی ئیرۆ 29ێ ئادارێ ب داخویانیەکێ پێشوازی ل بانگا مەزلووم عەبدی کر و دیار کر، پیچەک مایە ئەو بگھیژن لھەڤکرنەکا گشتی و دەستنیشان کر، “سەرکەفتنا دیالۆگێ ژ بۆ دۆزا نیشتیمانی و نەتەوی یا ستراتەژیکە.”
د داخویانیا نڤیسکی یا پەیەنەکێ دا ھاتە گۆتن، “تەڤی ھەموو ئاستەنگی و زەحمەتیێن کو د ڤێ قۆناغێ دا راستی مە ھاتنە ژی، لێ بەلێ د دیالۆگێن پەیەنەکێ و ئەنەکەسێ دا ل سەر گەلەک مژاران لھەڤکرن چێبوو.”
پینکێ دیار کر، پیچيک مایە کو بگھیژن لھەڤکرنەکا گشتی کو د ئەنجامێ دا لێڤەگەرەکا کوردی یا بلند و گشتی و د بریارا سیاسی دا سەربخوە، دەرکەڤیتە ھۆلێ و ھێڤی و خەونێن گەلێ کورد و دۆزا وێ یا عادل ل قادا نەتەوەیی و ناڤنەتەوەیی، تەمسیل بکەت. پەیەنەکێ دیار کر کو ئەو پابەندی لھەڤکرنێن بەری نھا نە و د ھەمان دەمێ دا بانگ ل ھەموو ھێزێن کوردی، کوردستانی، نەتەوەیی و ھەڤالبەند دکەن، ژ بۆ پشتگریا دیالۆگێن پەیەنەکێ و ئەنەکەسێ ھەولدانان بکەن و بانگ ل دەزگەھێن چاپەمەنیێ یێن کوردی ژی ھات کرن کو ھەر دو ئالیان نێزی ھەڤ بکەن.
