هۆزێن شه‌نگالێ: سۆزا ده‌رخستنا په‌كه‌كێ ب مه هاتییه دایین
په‌یڤدارێ ب ناڤێ هۆزێن عه‌ره‌ب یێن ل ناڤچه‌یێن كوردستانی ئه‌شكه‌ره كر كو ئارتیشا ئیراقێ سۆز ب وان داییه كو چه‌كدارێن په‌كه‌كێ ژ ده‌ڤه‌را شه‌نگالی ده‌رخن.
موزاحم حوێت، په‌یڤدارێ ب ناڤێ هۆزێن عه‌ره‌ب یێن ل ناڤچه‌یێن كوردستانی ژ بۆ كه‌نالا RT یا رووسیایێ گۆتییه: فه‌رماندارێتییا حه‌شدا شه‌عبی، ب تایبه‌ت فالح فه‌یاز سه‌رۆكێ ده‌سته‌یا برێڤه‌بر یا حه‌شدێ، سۆز ب مه داییه كو چه‌كدارێن په‌كه‌كێ و یێن گرێدای ڤێ رێخستنێ ژ شه‌نگالێ ده‌رخن.
ده‌ست نیشان كر، فالح فه‌یاز ئه‌ڤ سۆز د سه‌ردانا خوه یا ژ بۆی باژارێ مووسلێ ده ب مه داییه.
په‌یڤدارێ هۆزێن عه‌ره‌ب دبێژه: وان ژ فه‌یاز ره گۆ كو ئه‌و نكارن ب سه‌ده‌ما جینایه‌تێن په‌كه‌كێ ل شه‌نگالێ ده‌رباسی ناڤچه‌یێن خوه ببن و ڤه‌گه‌رن وارێ خوه.
هێژای گۆتنێ یه، حكوومه‌تا ناڤه‌ندی یا ئیراقێ هه‌یا رۆژا 1 نیسانا ئیسالێ مۆله‌ت ب په‌كه‌كێ و حه‌شدا شه‌عبی داییه كو ژ شه‌نگالێ ده‌ركه‌ڤن ژ بۆ كو په‌یمانا هه‌ولێر و به‌غدایێ ب ته‌مامه‌تی بكه‌ڤه د قادا جی ب جی كرنێ ده.
حكوومه‌تا باشوورێ كوردستانێ و حكوومه‌تا ئیراقێ ل سالا رابووری په‌یمانا ئاسایی كرنا ره‌وشا شه‌نگالێ ئیمزه كر، ل گۆری په‌یمانێ پێویسته په‌كه‌كه و حه‌شدا شه‌عبی ل ور نه‌مینن و ئه‌وله‌هییا وێ بكه‌ڤه ده‌ستێ ئارتێشێ و هێزێن پێشمه‌رگه‌هان، لێ به‌لێ ژ وێ ده‌مێ ڤه په‌كه‌كه بوویه ئاسته‌نگی ل همبه‌ری جی ب جی كرنا په‌یمانێ.
هه‌ر ل گۆری په‌یمانێ، باژارێ شه‌نگالێ وێ وه‌ره ئاڤه‌دان كرن و شێنیێن ئێزدی كو هێژان د كامپان ده نه، وێ ژ بۆی وارێ وان وه‌رن ڤه‌گه‌راندن.
