ترکیا گەفا ئۆپەراسیۆنێ بۆ سەر شنگال و مەخموورێ کر

ترکیا گەفا ئۆپەراسیۆنێ بۆ سەر شنگال و مەخموورێ کر

وەزیرێ بەرەڤانیا ترکیێ ھولوسی ئاکار راگھاند کو ئارتێشا ترکیێ ئۆپەراسیۆنێن خوە یێن ل دەرڤەیی سنۆری ژ بۆ ژناڤبرنا پەکەکێ بەردەوام دکەت و گۆت: “ئەم پێشھاتێن ل شنگال و مەخموورێ ژ نێزیک ڤە دشۆپینین و ھێڤی دکەین کو ژ بۆ ژناڤبرنا وان چ تشتێ پێویست د زووترین دەم دا بهێتە ئەنجامدان.”

وەزیرێ بەرەڤانیا ترکیا ھولوسی ئاکار تەڤی ھەژمارەکا فەرماندارێن ئارتێشا ترکیێ، سەردانا باژێرێ شرنەخێ کر و ل وێ دەرێ ب رێیا ڤیدیۆ کۆنفەرانسێ لگەل فەرماندەیێن یەکینەیێن ل سەر سنۆری ئاخڤت.

ھولوسی ئاکار دیار کر کو ئۆپەراسیۆنێن ئارتێشا ترکیێ دێ ب توندیەکا زێدە ل ھەمەبری پەکەکێ بەردەوام بن و ل ھەر دەرێ لەشکەرێن وان کەتنە دووڤ گەریلایێن پەکەکێ.

ئاکار ئاماژە ب وێ یەکێ کر گەریلایێن پەکەکێ ل باشوورێ کوردستانێ کۆم بوونە و “فەرماندەیێنن پەکەکێ ژ ترسا دو شەڤا ل دووڤ ھەڤ ل ھەمان جھ نامینن” و گۆت: “ل شەنگال و مەخموورێ ژ بۆ دەملدەست بێنە ژناڤبرن چ پێدڤی بکەت ئەم ل بەندێ نە کو زووتر بێنە کرن. ئەم پێشھاتێن ل ڤێ دەرێ ژ نێزیک ڤە دشۆپینین. د ڤێ مژارێ دا ئەم ل گەل برایێن خوەیێن ئیراقی د ناڤ ھەماھەنگیێ داینە و مە ژ بۆ موخاتەبێن خوە گۆتیە ھەر دەم بۆ ھەڤکاریێ ئامادەینە و ئەم دبێژین ژی. ئەم د وێ باوەریێ داینە کو جیرانێن مە یێن ئیراقی د ڤێ مژارێ دا تشتێ پێویست بکەن.”

ئەڤە نێزیکی 40 سالانە ترکیا بەردەوام ئۆپەراسیۆنێن لەشکەری ل ناڤچەیێن سنۆری یێن ھەرێما کوردستانێ دکەت. تەڤی وێ یەکێ ژی حەتا نھا نەکاریە پەکەکێ ژ وان ناڤچەیان دەر بکەت.

ژ پارڤە ژی ترکیا دیسا گەلەک ب دژواری دەست ب ئێرشکرنا سەر پێگەھێن پەکەکێ کر، ب تایبەتی ل باشوورێ کوردستانێ کریە و  ئارتێشا ترکیا دەرباسی ناڤ خاکا ھەرێما کوردستانێ بوویە، ل گەلەک جھێن ستراتەژیک ژی، بنکەیێن سەربازی داناینە.

پوستێن ھەمان بەش