باله‌فرێن ده‌وله‌تا تركیێ ئیرۆ ژی چكدارێن په‌كه‌كێ ل باشوورێ كوردستانێ ئارمانج كرن، دەما كو ستارگەهێن پەکەکێ ل سنۆرێ گوندێ سگێرا کەڤن یێ گرێدای ده‌ڤه‌را نهێلی یا سەر ب قەزا ئامێدیێ ڤە بۆردۆمان كری.
ل گۆری ئاگاهیێن پێگەها مە ژ چاڤکانیێن خوە یێن تایبەت ل ئامێدیێ ب دەست خوە خستی، ئیرۆ رۆژا سێشه‌می 6/4/2021ێ، باله‌فرێن ده‌وله‌تا تركیێ ستارگەهێن چه‌كدارێن په‌كه‌كێ ل گوندێ سگێرا کەڤن کو ب دووراتیا 6 کیلۆمەتران دکەڤیتە باکورێ رۆژهەلاتێ باژێرۆکێ ئامێدیێ ئارمانج کرن.
باله‌فران ل دەمژمێر 6:20ێ ئێڤاری رۆكه‌تەک ل بلنداهیێن گوندێ سگێرا کەڤن دایە، هه‌ر چه‌ند كو زرارێن په‌كه‌كێ نه‌هاتنه زانین، لێ به‌لێ ل گۆر ئاگاهیێن د دەستێ مەدا هندەک زرارێن مادی یێن پەکەکێ د ڤێ ئێریشێ دا هەنە.
گوندێ سگێرێ گوندەکێ باشوورێ کوردستانێ یە کو دکەڤیتە دەڤەرا نهێلێ یا سەر ب باژێرۆکێ ئامێدیێ ڤە، ئەڤ گوندە د سالێن هەشتیان دا ب سەدەما ئێریش و شەرێ سەپاندی یێ رژێما بەعس ب سەرۆکاتیا سەدام حوسێن ل سەر گەلێ باشوور، هاتبوو ڤالاکرن، خەلکێ ڤی گوندی ژی وەکە خەلکێ 5 هەزار گوندێن دی یێن کوردستانێ ئاوارە ببوون، پشتی سەرهلدانا سالا 1991ێ و دامەزراندنا حکوومەت و پەرلەمانێ کوردستانێ گوندەک نوو ژبۆی گوندیان هاتە ئاڤاکرن، لێ بەلێ ئەڤ جارە گوند ب سەدەما شەرێ سەپاندی یێ پەکەکێ ل دژی حکوومەت و گەلێ باشوور هاتە شەوتاندن و وێرانکرن و جارەکا دی خەلکێ ڤی گوندی ئاوارە بوون.
