کۆلبەرەکێ کورد یێ رۆژھلاتێ کوردستانێ تشتەکێ سەیر ئاشکەرا دکەت و دبێژیت، ھندەک کۆلبەر ژ بۆ کو بکاربن بارێن خوە هلگرن نەچار دبن مادەیێن ھشبەر بکار بینن!
ل رۆژھلاتێ کوردستانێ، ژ بەر کو تەڤاھیا چاڤکانیێن داھات و ژیانێ ژ ئالیێ دەولەت و رژیما ئیرانێ ڤە ھاتنە زەفتکرن و قۆرخکرن، وەلاتی ناچار دمینن رێیێن پر ب زەحمەت بۆ پەیداکرنا نانەکێ بگرنە بەر خوە. یەک ژ وان رێیان، کۆلبەرییە کو گەلەک جاران دبیتە سەبەبا مرنا کۆلبەران.
کۆلبەر پشتی کو رێیەک دوور و درێژ ب رێڤە دچن، بارەکی گەلەک ژ گرانیا خوە گرانتر ددەنە پشتا خوە. ھندەک جاران گرانیا باری دگەھیتە 70-80 کیلۆیان.
مالپەرا نیڤ فەرمی یا ئیرانی یا ب ناڤێ مێھرنیۆز راپۆرتەک ل سەر کۆلبەران و کۆلبەریێ بەلاڤ کریە.
کۆلبەرەکێ کورد و خەلکێ دەڤەرا ھەورامان، کو نەخواستیە ناڤێ وی بهێتە راگھاندن، بۆ ڤی مالپەری ئاشکەرا کریە، خەلکێ دەڤەرێ ژ بەر بەلەنگازیێ ناچار دمینن کۆلبەریێ بکەن. ئەو مرنێ ژی ددەنە بەر چاڤێن خوە، چمکی ت چاڤکانیەکا ژیانێ بۆ وان نەمایە.
وی کۆلبەری بەحسا تشتەکێ گەلەکی سەیر و ب ئێش ژی کریە و گۆتیە، بەشەک ژ کۆلبەران ژ بۆ کو بکاربن بارێ خوە راکەن، نەچار دمینن مادەیێن ھشبەر بکار بینن! ئەو ژی دبیتە سەبەب کو پشتی دەمەکێ ب مادەیێن ھشبەر ڤە بێنە گرێدان و ھێدی ھێدی قووەتا خوە ژ دەست بدەن و بەر ب فەلاکەتەکا دی ڤە بچن…
