د رۆژنامەیا فەرمی یا ترکیا دا ھاتە راگھاندن کو حکوومەتێ بریار دایە دەست دانیتە سەر مال و ملکێن 377 کەسان کو د ناڤ وان دا فەتحوللـاھ گولەن و هندەک ناڤێن سەرکردەیێن پەکەکێ ژی ھەنە.
ل ترکیا د ھندەک قۆناغان دا ھندەک بریار تێنە دایین کو گەلەک بالکێشن. دۆھی ب ئیمزایا وەزرێ ناڤخوە و وەزیرێ دارایی د رۆژنامەیا فەرمی یا دەولەتێ دا بریارەک ھاتە راگھاندن کو، دەما بریار د ڤێ رۆژنامەیا فەرمی دا دهێنە راگھاندن وەک قانوون دهێنە پەژراندن.
ب ڤێ بریارا ھاتیە دایین، حکوومەت سەرمایا ھندەک کەسایەتیا، دەزگەھا و کۆمپانیا دجەمدینیت. واتە دەولەت دەست دانیتە سەر سەرمایا وان و پەرەیێن وان د بانکان دا و ھەموو مال و ملکێن وان.
د لستەیێ دا ناڤێن بالکێش ھەنە. پرانیا دەزگەھ و کۆمپانیا ئەون کو ب ھەڤالتیا گولەن تێنە تۆھمەتبار کرن. وەکی دی ناڤێ ھندەک کەسایەتێن ژ رێخستنێن چەپێن ترک ژی ھەنە. لێ یا ھەری بالکێش ناڤێ ھندەک رێڤەبەرێن پەکەکێ نە.
د ڤێ لیستەیێ دا ناڤێ عەلی حەیدەر قەیتان، جەمل بایک، دوران کالکان، موراد قەرەیلان، رەمزی کارتال، سەبری ئۆک، رزا ئالتون و زوبەیر ئایدار و هەر وەها ناڤێ مەزلووم عەبدی یێ فەرماندارا گشتی یێ هێزێن سووریا دەمۆکراتیک ژی ھەیە. دهێتە زانین کو گەلەک بەرپرسێن پەکەکێ، ب رێیا ھندەک بازرگانێن خوە ل ترکیا و باکورێ کوردستانێ بازرگانیەکا مەزن دکەن. تایبەتی د ناڤ وان دا ناڤێن وەک زوبەیر ئایدار، رەمزی کارتال و رزا ئالتون دەردکەڤنە پێش. بێ گومان کەسێن ل قەندل ژ ڤێ یەکێ ئاگاھدارن.
