یەک دن ژ وان کەسێن کو ژ پەکەکێ قوت بوویی و پاشان وەک سیخۆر هاتییه راگه‌هاندن، ئیبراهیم ئایدن یێ ب کۆد ناڤێ «زیاد ە». ئیبراهیم ئایدن، ل سالا 1950ێ ل دێرسمێ ژ دایک بوویە، ل سالا 1970ێ ل زانینگەها ئەنقەرێ هاتییە وه‌رگرتن و بۆ دەما 3 سالان ل بەشێ مامۆستاتیێ یێ زانینگەها ئەنقەرێ خواندییە و ل سالا 1974ێ هەتا 1978ێ ل غازی عەنتاب و مێردینێ مامۆستاتی کرییە.
ل سەر دەما خواندنێ ل زانینگەهێ، رۆژا 31/3/1972ێ پاش كۆمبوونه‌كا خوەندکارێن زانینگەهێ، ل دژی کوشتنا «ماهر چایان» سەرۆکێ رێخستنا «لاوێن وه‌لاتپارێزێن ترکیێ» و نێزیكی 10 ئه‌ندامێن کۆمیتەیا ناڤەندی یا ڤێ رێخستنێ، ژ ئالیێ پۆلیسێن ترکیێ ڤە هات گرتن.
ل گۆری داخویانییا ناڤبووری، هه‌ژمارا گرتییان نێزیكی 120 خوەندکاران بوون، ژ دوو بەشێن مامۆستا و بەشێ زانستێن سیاسی یێن زانینگەها ئەنقەرێ و یەک ژ گرتییان عه‌بدوللا ئۆجالان بوویە.
ئەو یەک بوویە ژ ئه‌ندامێن گرووپا ئیدۆلۆژیکا پەکەکێ و ل سالا 1980ێ، بەرپرسێ کۆمیتەیا ناڤەچەیا ئەنقەرێ یا پەکەکێ بوویە، هەر د ڤێ سالێ دا دگه‌ل جه‌میل باییك ئەرکێ برێڤەبرنا په‌یوه‌ندیێن ئۆجالان د نێڤبەرا سووریێ و ترکیێ دا برێڤە برییە.
پشتی كۆده‌تایا 29/9/1980ێ یا ترکیێ، دگه‌ل «عەلی چەتین» رەڤییه سووریێ و ل وێرێ دگه‌ل جەمیل باییک و «سوبحی قەرەقۆش» یێ ب كۆد ناڤێ «شۆرش» کو پاشتر ژ ئالیێ پەکەکێ ڤە دهێته کوشتن، ل کامپا بەرەیا دەمۆکراتا فەلستینێ، ئەرکا پەروەردە کرنا ئه‌ندام و گەریلایان وەرگرتییە.
ئه‌ندامێ کۆمیتەیا ناڤەندی و هه‌لبژارتیێ کۆنگرەیا ئێك و دوو بوویە و د کۆنفرانسا ئەورۆپایێ یا پەکەکێ دا سەرۆکێ دیوانا کۆنگره‌ی بوویە.
ل سالا 1985ێ ب سووچا هاریكارییا چەتین گۆنگۆر «سەمیر» و کەسیرە یلدرم «فاتیمە» کەتییە ژێر چاڤدێریێ و وەک ئەو ب خوە دبێژیت، ژ ترسا ڤێ یەکێ کو دبیت سەرکردەیێن پەکەکێ فەرمانا کوشتنا وی بده‌ن، د ناڤا پەکەکێ دا رەڤیاییە و ب هاریكارییا مەسعوود بارزانی و پارتییا دەمۆکراتا کوردستانێ خوە گه‌هاندییە سووریێ و ل وێرێ بەر سوێدێ چوویە.
