جیگرێ نوونەرێ ئامەریکا ژ بۆ سووریێ دێیڤید برۆنستەن سەردانا بارەگەھا ئەنجوومەنا نشتمانی یا کورد ل سووریێ (ئەنەکەسێ) کر.
ل گۆر زانیاریان، دێیڤید برۆنستەن دوھ سەردانا بارەگەھا ئەنەکەسێ ل قامشلۆ کریە و د جڤینێ دا ھەر دو ئالیان پرسگرێکێن ل پێش دیالۆگا د ناڤبەرا ئەنەکەسێ و پارتیێن یەکیتیا نشتمانی یا کورد (پەیەنەکێ) دا گەنگەشە کرن.
ل گۆر زانیاریێن ژ لایێ K24 ڤە هاتیە بەلاڤکرن، جیگرێ نوونەرێ ئامەریکا ژ بۆ سووریێ د جڤینێ دا تەکەز کر کو ئامەریکا پابەندە ب ھەر رێکەفتنەکێ د ناڤبەرا ئەنەکەسێ و پەیەنەکێ دا و دیتنا چارەسەریا سیاسی ل سووریێ.
ئەنەکەسە و پەیەنەکێ ژ مژدارا 2019ێ ڤە ب پشتگریا ئامەریکا، ھەرێما کوردستانێ و ھێزێن سووریایا دەمۆکراتیک (ھەسەدێ) دانووستەندنێن یەکرێزیا کوردی و بەشداریا ئەنەکەسێ د ناڤا رێڤەبەریا رۆژئاڤایێ کوردستانێ دا دکەن، لێ دەمەکە دانووستاندن راوەستیانە.
برۆنستەن ژی د مژدارا 2020ێ دا جھێ بالیۆز ویلیام رۆیبووک گرت و نھا دیپلۆماتێ ھەری پایەبلندێ ئامەریکایێ ل رۆژئاڤایێ کوردستانێ و باکورێ رۆژھلاتێ سووریێ یە.
