ل عەفرینێ میلیشیایێن سەر ب ترکیا ڤە دەست دانا سەر زەڤیێن وەلاتیێن کورد

ل عەفرینێ میلیشیایێن سەر ب ترکیا ڤە دەست دانا سەر زەڤیێن وەلاتیێن کورد

ل باژێرۆکێ شیێ یێ سەر ب ھەرێما عەفرینێ ڤە، چەکدارێن میلیشیا یێن فرقەیا سلتان سلێمان شاھ دەست دانایە سەر زەڤیێن 6 وەلاتیێن کورد و ژ بۆ عەرەب و ترکومانێن ھاوردە دەست ب ئاڤاکرنا خانیان کریە.

یەک ژ وان وەلاتیێن کو زەڤیێن وی ھاتنە دەستەسەرکرن راگھاندیە کو پرۆژەیا ئاڤاکرنا خانیان کەتیە وارێ جێبەجێکرنێ دا.

باژێرۆکێ شیێ یێ ھەرێما عەفرینێ یا رۆژئاڤایێ کوردستانێ کو ئارتێشا ترکیێ و گرووپێن چەکدارێن گرێدایی وێ باژێرۆکێ ناڤبۆری داگیر کرنە. نیشتەجیێن ڤی گوندی 100% کورد بوون، لێ نها ب سەدەما داگیرکرنا ڤێ ناڤچەیێ بەرە بەرە ب شێوازەکێ سیستەماتیک هەول دهێتە دان ئەڤ ناڤچەیە بهێتە تەتریک و تەعریبکرن.

دیمەن ل مەیدانا باژێرۆکێ شیێ کو رۆژا 17ێ ئادارا 2021ێ ھاتنە کشاندن، دیار دکەن کو باژێرۆک تەژی چەکدار و عەرەب و ترکومانێن ھاوردە بوویە.

نھا ل شیێ، پرۆژەیەکێ ئاڤاکرنا یەکەیێن نشتەجیبوونێ ژ بۆ عەرەب و ترکومانێن ھاوردە ل سەر زەڤیێن نشتەجیێن رەسەن کو کوردن دهێتە جێبەجێکرن.

نشتەجیێن رەسەنێن باژارۆکێ شیێ 100% کورد بوون، لێ پشتی داگیرکرنا وێ ژ لایێ ھێزێن ترکیێ و گرووپێن چەکدارێن ئۆپۆزسیۆنا سووریێ، نھا تەنێ 55% کورد مانە و 45% بوونە عەرەب و ترکومانێن ھاوردە.