پاش کو رۆژا دوشەمبی وەزیرێ دەرڤە یێ رووسیایێ، سێرگی لاڤرۆڤ دا خوەیا کرن کو رووسیا ناخوازیت ترکیا مایتێکرنێ د رەوشا ئۆکراینایێ و رەوشا ڤێ داویێ یا ناڤچەیا دۆنباس کو تێدە شەر د ناڤبەرا رووسیا و ئۆکراینایێ دا روو ددەت بکەت و هەر ووسا ترکیا هشیار کربوو کو نابیت هاریکاریا گرووپێن چەکدارێن ئۆکراینی بکەت و چەک و جەبلخانەیان ژ وان را بشینیت، دوهی رۆژا سێشەمبی ژی دیسا رووسیایێ هوشداری دا ترکیا.
د ڤێ دەربارێ دا جێگرێ وەزیرێ دەرڤە یێ رووسیایێ سێرگی ریابکۆڤ راگهاند، ب چ رەنگان ئەم ناخوازین ببهیسین کو بالەفرێن بێ پیلۆت یێن ترکیا هاتینە شاندن ژ بۆی ناڤچەیا دۆنباس و پێدڤی دکەت ترکیا د ڤێ دەربارێ دا گەلەکی هشیار و چاڤ ڤەکری بیت و خوە ژ ئاڤێتنا هەر پێنگاڤەکا ب ڤی ئاوا دوور بگریت کو ببیتە سەدەما حاجزبوون و تورەبوونا رووسیایێ.
