ژ ترسا پەکەکێ سەرۆکێ هەڤپەیمانیا نیشتیمانی رەڤیا ترکیێ

سەرۆکێ هەڤپەیمانیا نیشتیمانی ب سەدەما وێ یەکێ کو بەرپرسێ رانیێ یێ ڤێ پارتیێ ژ لایێ پەکەکێ ڤە هاتیە دەستەسەرکرن و پشت را دانپێدان کریە کو ل ژێر فەرمانا وی سیخوری ژ بۆی دەولەتا ترکیێ کریە رەڤیا ترکیێ.

پشتی کو ل 15/10/2020ێ یەک ژ بەرپرسێن هەڤپەیمانیا نیشتیمانی ل قەندیلێ وەندا دبیت، پشترا ئاشکەرا دبیت پەکەکێ ئەو کەس دەستەسەر کریە، لێ بەلێ پەکەکێ هیچ ئاگاهیەک دەربارا دەستەسەرکرنا ڤی کەسی بەلاڤ نەکرن.

محەمەد گرتکی بەرپرسێ رانیێ یێ هەڤپەیمانیا نیشتیمانی ل دەمژمێر 9:00 سپێدا رۆژا پێنجشەمی 15/10/2020ێ ژ مالا خوە دەرکەتبوو، ل دەمژمێر 12:00ێ هەمان رۆژێ تەلەفۆنا وی قەپات دبیت و نووچەیێ دیار نەمانا وی ژ لایێ کورێ وی ڤە بەلاڤ دبیت.

ل گۆر زانیاریێن پێگەها دارکا مازی کو ژ چاڤکانیێن خوە یێن تایبەت ل باشوورێ کوردستانێ ب دەست خستنە، پەکەکێ ئەڤ بەرپرسێ هەڤپەیمانیا نشتمانی دەستسەر کریە و پشترا ناڤبووری دانپێدان کریە کو ژ بۆی ترکیێ سیخورتی کریە.

محەمەد گرتکی هەر وەها دانپێدان کریە کو هەموو کارێن سیخوریا سەر پەکەکێ ل ژێر فەرمان و چاڤدێریا ئارام قادرێ سەرۆکێ هەڤپەیمانیا نیشتیمانی ئەنجام دایینە، ژبەر ڤێ یەکێ و ژ ترسا پەکەکێ نها ئارام قادر رەڤیایە و ل ترکیایێ نیشتەجی بوویە.

پارتیا هەڤپەیمانیا نیشتیمانی، ل مەها کانوونا دویەمین یا سالا 2018ێ ب ناڤێ “هەڤپەیمانیا دەمۆکراسی و دادپەروەری” یەکەم جڤینا خوە ئەنجام دا و بەرهەم سالح ب سەرۆکێ ڤێ پارتیێ هاتە دەستنیشانکرن، پشترا بەشداری هەلبژارتنێن پارلامانتۆیا ئیراقێ بوو و کاری دو کورسیان ب دەست خوە بێخیت، لێ بەلێ ل مەها ئیلۆنا هەمان سالێ بەرهەم سالح ژ بەر بەرژەوەندیێن خوە یێن شەخسی و بدەستخستنا پۆستێ سەرۆک کۆماریا ئیراقێ دەست ژ ڤێ پارتیێ بەردا و جارەکا دی تەڤلی رێزێن یەکیتیا نیشتیمانی یا کوردستانێ “یەنەکێ” بوو.