ل باشوورێ کوردستانێ هەڤدەم د گەل کریزا ئابووری کریزا گیایێن بهاری ژی پەیدا بوویە!

ل باشوورێ کوردستانێ تەڤی کریزا ئابووری کریزا گیایێن بهاری ژی پەیدا بوویە

د وەرزێ بهارێ دا ل پرانیا چیایێن کوردستانێ گیایێن جور بە جور شین دبن و ئەڤ گیایە ژ بۆی چەند مەرەمێن جودا وەکو خوارن و دەرمانێن کوردی د ناڤا گەل دا تێنە بکار ئانین، لێ ئیسال بازارێ ڤان گیایان ل باشوورێ کوردستانێ پر لاوازە.

هەرچەند کو وەرزێ بهارێ ب جوانیا خوە و دەستپێکرنا سەرسالا کوردی دهێتە ناسکرن، لێ بەلێ د ڤی وەرزی دا هندەک گیایێن خوارنێ ل چیایێن کوردستانێ شین دبن کو ژ لایەکێ دبنە ژێدەرەک ژ بۆی دەستخستنا هندەک پارە ژ بۆی خەلکێ گوندان و ژ لایەکێ دی خەلک ب ئاوایەکێ گشتی د خوارنێن کوردی دا بکار دئینیت.

ل گۆری زانیاریان ئیسال ئەڤ گیایە ل باشوورێ کوردستانێ گەلەک کێم بوونە، سەدەمێن کێم بوونا ڤان گیایا ژ بۆی سێ سەدەمێن سەرەکی ڤەدگەریت کو ئەو ژی ئەڤەنە:

  • شەرێ د ناڤبەرا پەکەکێ و دەولەتا ترکیێ دا ل سەر خاکا باشوورێ کوردستانێ، کو ئاستەنگەک سەرەکی یە، ژبەرکو خەلکێ گوندان ژ بەر پاراستنا جانێ خوە داکو ژ لایی بالەفرێن ترکیا ڤە نەهێن ئارمانج کرن گەلەک کێم دچنە چیایا، ب تایبەتی چیایێن وەکو گارە، مەتین، حەفتەنین و هتد…

  • باجا کو پەکەکە ژ خەلکێ گوندا دستینیت. سەرەرای هەموو گەفێن ل سەر ژیانا وان، هندەک ژ خەلکێ گوندێن باشوورێ کوردستانێ ژ بۆی پەیداکرنا نانێ ژیانێ، جانێ خوە تێخن مەترسیێ و ژ بۆی ب دەست خستنا گیا و فرۆتنا وان ل بازاری دچنە چیایێن کوردستانێ، لێ بەلێ چەکدارێن پەکەکێ خوە باجا گیایێن بهاری ژی ژ وان دستینیت.

  • کێم بارینا باران و بەرفێ د ئیسال دا. ئیسال رێژەیا بارینا بەرف و بارانێ ل باشوورێ کوردستانێ گەلەک کێم بوویە، ب ئاوایەکێ کو مەترسیا هشکەسالیێ ل سەر باشوورێ کوردستانێ هەیە، ئەڤ چەندە ژی بوویە سەدەم کو رێژەیا گیایێن بوهاری کێم ببیت.