فەرماندەیەکێ پێشمەرگە دبێژیت چەکدارێن پەکەکێ ژن و زارۆکێن ئێزدی کۆم کرنە و وان وەکو مەرتالێ مرۆڤی بکارتینیت و ئەو برنە سەر رێیا ئارتێشا ئیراقێ.
فەرماندارێ پێشمەرگەیێن ئێزدی میرزا خەلەف دەربارێ گرژیا د ناڤبەرا پەکەکێ و ئارتێشا ئیراقێ دا ژ بۆی باس نیۆز ئاخڤت و گۆت: ” چەکدارێن پەکەکێ ژن و زارۆکێن ئێزدی کۆم کرینە و ئەو برنە سەر رێیا ئارتێشا ئیراقێ ل چیایێ شنگالێ ژ بۆ کو رێکێ ل بەر چوونا ئارتێشا ئیراقێ بگریت و وان وەکو مەرتالێ مرۆڤی بکاردئینیت. “
ھەروھا میرزا خەلەف دبێژیت: “پەکەکە وەکو ھەردەم خەلکێ ئێزدی ژ بۆ مەرامێن خوە بکار دئینیت و نھا ژی خەلکێ شنگالێ بکاردئینیت و رێگریێ ژ بۆ چوونا ئارتێشا ئیراقێ بۆ ناڤا شنگالێ دورست دکەت. دبیت ئارتێشا ئیراقێ ژ بۆ چەند دەمژمێران مۆھلەت دابیتە پەکەکێ ژ بۆ کو ژ شنگالێ و سیبا شێخ خدر دەرکەڤیت.
میرزا خەلەف ئاماژە ب وێ یەکێ ژی کر کو چەندین جارە ئیراق مۆھلەتێ ددەتە پەکەکێ کو لگۆر رێکەفتنا شنگالێ ژ شنگالێ دەرکەڤیت. لێبەلێ حەتا نھا ژ شنگالێ دەرنەکەتیە و مومکینە رێکەفتنەکا نھێنی د ناڤبەرا وان دا ھەبیت. ھەروھا حەتا نھا حەشدا شەعبی پشتەڤانیێ ل مانا پەکەکێ ل شنگالێ دکەت.
