سەرۆک کۆماریا ترکیا بریارا سەرۆکێ ئامەریکایێ جۆ بایدن یا ناسکرنا جینۆسایدا ئەرمەنیان رەد دکەت و بانگا سەرەراستکرنا بریارێ دکەت.
بەردەڤکێ سەرۆک کۆمارێ ترکیا ئیبراھیم کالن گۆت، ئەو داخویانیا سەرۆکێ ئامەریکایێ ب چ رەنگا قەبوول ناکەن، ئەو ژ راستیێ دوورە، ب نیازەکا خراپ ھاتیە گۆتن و د خزمەتا نەیارێن ترکیا دایە.
وەزارەتا دەرڤەیا ترکیا گۆت ژی، داخویانی ب ئارمانجا ئارامکرنا نەیارێن ترکیایێ ھاتیە دایین و ھەمبەر ئاشتی و دادوەریێ خیانەتا ھەری مەزنە.
ھەر د وێ دەربارێ دە سەرۆک کۆمارێ ترکیا رەجەب تەییب ئەردۆگان ژی پەیامەک ژ بۆ پاتریکێ ئەرمەنیێن ترکیا شاند و گۆت، ترک و ئەرمەنی سەدان سالا د ناڤ ئاشتیێ دا پێکڤە ژیانە و کارێن کو دڤێت دیرۆکناس بکەن، نھا ژ لایێ لایەنێ سێیەمین ڤە، بۆ دەستێوەردانا ترکیایێ دهێتە بکارانین. ئەردۆگان گۆت، ئەو ئامادە نە د گەل ئەرمەنستانێ دا ھەموو پەیوەندیێن خوە پێش بێخن.
دەستھلاتداریا ترکیا د سالا 1915ێ دا ل ھەمبەری ئەرمەنیان جینۆساید پێک ئانین و نێزکێ 2 ملیۆن ئەرمەنی کوشتن. یێن کو خوە خلاس کرن ژی، دەست ژ مال و جھێن خوە بەردان و کۆچبەر بوون.
حەتا نھا نێزی 30 دەولەتان ئەڤ کریارا دەولەتا عۆسمانی وەکی جینۆساید ناس کریە.
