ل یەک ژ ناڤچەیێن سنۆری یێن باژێرێ مەریوان یێ رۆژهلاتێ کوردستانێ، هەری کێم 5 کۆلبەرێن کورد ب تەقەیا راستەراستا هێزێن رەژێما ئیرانێ بریندار بوون و پشت را بۆ نەخوەشخانەیێن ڤی باژێری هاتنە ڤەگوهاستن.
رێخستنا مافێن مرۆڤ یا هەنگاو راگهاند کو سەرێ سپێدە یا ئیرۆ یەکشەمێ 25/4/2021ێ، هێزێن رەژێما ئیرانێ ل ناڤچەیا سنۆری یا ب ناڤێ “قۆلقۆلە” ل باژێرێ مەریوانێ، تەقە ل کاروانەکێ کۆلبەرێن کورد کریە و هەری کێم 5 کۆلبەر بریندار کرینە.
هەنگاوێ ناسنامەیا وان 5 کەسان ئاشکەرا کریە و راگهاند: “کاروان مەنووجەهری، زانیار حاتەم پەناهـ، سەلاح وەتەن دۆست، سۆران وەتەن دۆست و ئارام مەنووچەهری” کو خەلکێ باژێرێ مەریوان و گوندێ میراوا یێ سەر ب مەریوانێ نە، ژ لایێ هێزێن سوپایێ پاسدارێن ئیرانێ ڤە ب تەقەیا راستەراست هاتینە ئارمانج کرن و پشترا بریندار بوونە.
پشتی کو کاروانێ ڤان کۆلبەرێن کورد کەتیە کەمینەیا هێزێن سەر سنۆر و بریندار بووی، حەتا نها چارەنڤیسا هەری کێم 30 کۆلبەرێن دی یێن ڤی کاروانێ کۆلبەرا خوەیا نەبوویە.
هاتە زانین کو ئەڤ کۆلبەرێن بریندار بووی ژ بۆی نەخوەشخانەیا “بوعەلی” یا باژێرێ مەریوانێ هاتینە ڤەگوهاستن.
