ل پارێزگەها سنە کارگرووپا چاکسازیا سیستەما هاریکاریێن حکوومی یێن تایبەت ب گەنمی، ئاری و نانی راگهاندیە، ژ بۆی وەکهەڤکرنا بهایێ نانی ل باژارێ سنە د گەل بهایێ نانی ل پارێزگەهێن دی، لیستەیەکا نوو ژ بۆی بهایێ نانی دایە دەست فرنەیێن نانی یێن ڤێ پارێزگەهێ.
ل گۆر بهایێ نوو یێ نانی ل ڤێ پارێزگەهێ ژ سبە رۆژا سێشەمبی 27/4/2021ێ هێرڤە، پێویستە نانپێژی ب بهایێن نوو نانی بفرۆشن ب ئاوایەکی کو بهایێ یەک نانی کو بەرا نها 250 توومەن بوون ب 300 توومەنان ب خەلکێ بهێتە فرۆشتن.
هەر د ڤێ دەربارێ دا ل 21/4/2021ێ ئیدارەیا دەخل و دانی ل پارێزگەها ئۆرمیێ بهایێ نانی ل ڤێ پارێزگەهێ گرانتر کربوو.
بلند بوونا بهایێ نانی ل هەر دو پارێزگەهێن ئۆرمیێ و سنە ل رۆژهلاتێ کوردستانێ د دەمەکێ دا یە کو ئەڤ پارێزگەهە د رێزبەندا 3 پارێزگەهێن یەکەم یێن بەرهەمئانینا گەنمی تێنە هژمارتن.
بلندبوونا بهایێ نانی د دەمەکێ دا یە کو بهایێ گەنمی چ گوهەرینەک ب سەردا نەهاتیە و جۆتکارێن کورد ب سەدەما نزم بوونا بهایێ گەنمی، ناچارن بەرهەمێن خوە ژ بۆی خوارنا حەیوانان بفرۆشن حەیواندارا.
هێژایی گۆتنێ یە هاڤینا رابووری پاش کو نان ل ئیرانێ کێم بووی، کاربدەستێن رەژێما ئیرانێ ژ سەدێ 30 حەتا 45%، بهایێ نانی گرانتر کر و نها ژی دهێتە گۆتن کو دبیت جارەکا دی 70 ژ سەدێ گرانتر ببیت.
