پاسدارێن بنگەهەکێ لەشکری یێ سوپایێ پاسدارێن ئیرانێ ل رۆژهلاتێ کوردستانێ، گولـلە بەردانە هەڤ دو و ب ڤێ سەدەمێ فەرماندارێ ڤی بنگەهی و پاسدارەک دی هاتنە کوشتن.
چاڤکانیێن مەدیایی ل رۆژهلاتێ کوردستانێ ئاشکەرا کریە، دوهـی رۆژا دوشەمبی 26/4/2021ێ، ل بنگەهەکێ لەشکری یێ ب ناڤێ “کاوە” ل جادەیا “ساحلی” یا باژێرێ شنۆ د ناڤبەرا چەکدارێن سوپایێ پاسداران شەر روو دایە و دو چەکدار کو یەک ژ وان فەرماندار بوویە هاتینە کوشتن و چەکدارەک دی ژی بریندار بوویە.
د ڤێ دەربارێ دا مالپەرا “میهر” یا ئیرانێ هەڤدەم کو تەکەزی ل سەر بوویەرێ کریە، لێ بەلێ ب تەنێ ئاماژە ب کوشتنا فەرماندارەکێ بلند یێ سوپایێ پاسداران ب ناڤێ “وەحید زەرئەفشان” کریە کو د دەما بجی ئانینا ئەرکێ خوە دا هاتیە کوشتن و ئاماژە ب کوشتن و برینداران و هۆرگلیێن زێدەتر نەکریە.
“وەحید زەرئەفشان” فەرماندارێ یەکەیا 310 یا سوپایێ پاسداران ل باژێرێ شنۆ یێ رۆژهلاتا کوردستانێ بوو.
یێن د ڤێ رووداوێ دا هاتیە کوشتن هەموو ترک و نیشتەجێ یێن باژێرۆکێ نەغەدێ نە، ژ ئالیێ خوە ڤە حەتا نها چاپەمەنیا ئیرانێ باس ل سەدەمێن ڤێ بوویەرێ نەکرینە.
هندەک رێخستنێن تایبەت یێن گرێدایی مافێن مرۆڤا ل رۆژهلاتێ کوردستانێ، ئاماژە ب ڤێ یەکێ کریە کو ئەڤ فەرماندارێ سوپایێ پاسداران ب سەدەما شەر و ئالۆزیا د گەل ئەندامەکێ بەسیجێن ئیرانێ “پارێزڤانێن خوەبەخش یێن پاراستنا شۆرەشا ئیسلامی یا ئیرانێ” هاتیە کوشتن. ل گۆر نووچەیێن هاتیە پارڤەکرن، ئەڤ ئەندامێ بەسیجێن ئیرانێ پشتی کو فەرماندارێ بنگەهی دکوژیت، ژیانا خوە ژی ب داوی ئینایە.
