وەزیرێ دەرڤە یێ ئیرانێ جەواد زەریف پشتی کارڤەدانێن زێدە یێن ل سەر بەلاڤبوونا تۆمارا وی یا دەنگی کو رەخنە ل قاسم سولەیمانی و ئالیێ لەشکەری یێ ئیرانێ دگرتن، پاشدا گاڤ هاڤێت و گۆت، “ئەز خەمگینم”.
د ھەڤپەیڤینا دەنگی یا نیزیکی 3 دەمژمێران دا کو د مەدیا جیھانێ دا ژی بەلاڤ بوویە دا، زەریف دبێژیت، دیپلۆماسیا ئیرانێ ل گۆر ھەوا و ھەوەسا رێبەرێ بلندێ ئیرانێ عەلی خامنەیی و قاسم سولەیمانی برێڤە دچیت.
ل سەر ڤان گۆتنان مەدیایا ئیرانێ یا گرێدایی سوپایایێ پاسداران ب توندی ئێریش کرە سەر زەریف و سەرۆک کۆمارێ ئیرانێ حەسەن روحانی و حکوومەتا وی.
زەریف ھەروھا ژ بەر دەستوەردانا وی د کارووبارێن وەزارەتا دەرڤە دا رەخنەیان ل سولەیمانی دگریت و دیار دکەت کو کریارێن سەرفەرماندار قاسم سولەیمانی رێگریێ ل بەر دیپلۆماسیا وی دروست دکەن.
ژ لایێ دی بەردەڤکێ کۆمیسیۆنا کاروبارێن دەرڤە و ئاسایشا نیشتیمانی یا پارلامانتۆیا ئیرانێ، ئەبولفەزل ئەموویی ژ بۆی ئاژانسا تەسنیم نیۆز یا نێزیکی سوپایێ پاسداران راگھاندیە کو وی ل سەر مژارێ ژ محەمەد جەواد زەریف خواستیە بەشداری جڤینا یەکەما کۆمیسیۆنا کاروبارێن دەرڤە و ئاسایشا نشتمانی ببیت.
حەسەن روحانی ژی پشتی بەلاڤبوونا تۆمارا دەنگی د جڤینا کابینەیا خوە دا دیار کر کو دژمن ل دووڤ پارچەبوونا د ناڤ ریزێن مە دایە لێ دڤێت ئەم نەھێلین ئەڤ چەندە دروست ببیت.
وەزیرێ دەرڤەیێ ئیرانێ جەواد زەریف ل سەر حەسابا خوە یا ئینستگرامێ ل سەر وێ ھەڤپەیڤینێ پاشدا گاڤ هاڤێت و ئەڤ بەرسڤە ل سەر کارڤەدانان دا:
“ئەز گەلەک خەمگین بووم کو نیقاشەکا تەئۆریکا نهێنی ل سەر لەزگینیا ھەڤدەمکرنا دیپلۆماسیێ و قادا شەری – کو ئەزموونێن ھێژا یێن ھەشت سالێن داوی نە ژ بۆ سوود وەرگرتنا بەرپرسێن بەرێ – هاتە گوهەرین ژ بۆی نیقاشەکا ناڤخوەیی.”
